काठमाडौँ, ५ मंसिर ।  स्वास्थ्य तथा जनसंख्या मन्त्रालयले ७७ वटै जिल्लामा जनस्वास्थ्य कार्यालय राख्ने योजना पुन अघि बढाएको छ । मन्त्रालयले सो सम्वन्धमा सैद्धान्तिक सहमति लिन गत सोमबार मन्त्रिपरिषदमा प्रस्ताव पठाएको छ ।

मन्त्रालयले सहमतिका लागि पठाएको सोही प्रस्तावमा सातवटै प्रदेशमा तालिम केन्द्र, प्रयोगशाला, मेडिकल स्टोर र औषधि व्यवस्था विभागको शाखा कार्यालय स्थापना गर्ने भन्ने समेत छ ।

मन्त्रालयका सहसचिव जनादर्न गुरागाईँका अनुसार यस सम्वन्धी प्रस्ताव गत सोमबार पठाएको हो । ‘अब मन्त्रिपरिषद्ले सहमति दिनासाथ हामी जिल्ला तथा प्रदेश कार्यालयमा कति जनशक्ति राख्ने ? नयाँ संरचनाले के के काम गर्ने ? आदि बारेमा तयारी हुनेछ,’ गुरागाईँले भने ।

मुलुक संघीय संरचनामा गएसंगै यसअघिको जिल्ला जनस्वास्थ्य कार्यालय, क्षेत्रीय तालिम केन्द्र, क्षेत्रीय मेडिकल स्टोरको संरचना खारेजमा परेको थियो । नयाँ संरचनामा ७७ वटा जिल्ला स्वास्थ्य जनस्वास्थ्य कार्यालयको ठाँउमा एउटा, दुईवटा र तीन वटासम्मका जिल्ला मिलाएर प्रदेश मातहतमा रहने गरी ३५ वटा स्वास्थ्य कार्यालय खोलिएको छ ।

उपप्रधान एवं स्वास्थ्य मन्त्री उपेन्द्र यादवले जिल्ला स्वास्थ्य कार्यालय हटाउँदा स्थानीय तहको स्वास्थ्य सेवा प्रभावित हुने भन्दै सरकार पुरानो निर्णयबाट व्याक हुन खोजेको बताउँदै आएका थिए । मन्त्रालयका सहसचिव गुरागाईँले ७७ वटै जिल्लामा कार्यालय खोलेपनि आकार र कामको दृष्टिकोणले केही फरक हुनसक्ने बताए ।