काठमाडौँ, २९ असोज । त्रिभुवन विश्वविद्यालय चिकित्साशास्त्र अध्ययन संस्थान (आइओएम)ले आफू अन्तरगतका मेडिकल तथा डेन्टल कलेजलाई शैक्षिक सत्र २०७४ / ७५ का लागि सिफारिस गरेको सीट संख्यामा नेपाल मेडिकल काउन्सिलले ‘कैची’ चलाएको छ ।

काउन्सिलको गत शुक्रबार बसेको पूर्ण बैठकले आइओएमबाट सिफारिस भएर १० वटा मेडिकल तथा डेन्टल कलेजमध्ये तीनवटाको सीट परिवर्तन गरेको छ । परिवर्तित सीटमा सबै डेन्टल तर्फका छन् ।

काउन्सिल स्रोतका अनुसार ललितपुरको किष्ट मेडिकल कलेजका लागि आइओएमले बीडीएसमा ५० सीट सिफारिस गरेको थियो तर काउन्सिलले सो कलेजका लागि ४५ सीट तोकेको छ ।

त्यस्तै आइओएमले चितवन मेडिकल कलेजलाई बीडीएस सञ्चालन गर्न ५० सीट सिफारिस गरेको थियो । तर काउन्सिलले १० सीट कम गर्दै ४० मा झारिदिएको छ ।

उता ३५ सीट पाएको बीरगञ्जस्थित एमबी केडीया डेन्टल कलेजको काउन्सिलले ३० सीट निर्धारण गरेको छ ।
अरु कलेजहरुको सीट भने यथावत रहेको छ ।