काठमाडौँ, १९ असोज ।  कानुनी चिकित्सक संघ नेपाल (मेडिको–लिगल सोसाइटी अफ नेपाल)को अध्यक्षमा डा. सृजना कुँवर निर्वाचित भएकी छन्।

संघको २०८३ असोज १७ गते सम्पन्न ११औँ वार्षिक साधारणसभाले डा. कुँवरको अध्यक्षतामा २०८३-८५ का लागि नयाँ कार्यसमिति गठन गरेको हो।

नयाँ कार्यसमितिको उपाध्यक्षमा डा. केशव श्रेष्ठ, सचिवमा डा. आयुष पौडेल उपाध्याय र कोषाध्यक्षमा डा. देवेन्द्रमान पालिखे चयन भएका छन्। सदस्यहरूमा डा. आहना श्रेष्ठ, डा.सन्तोष कोइराला, डा. शर्मिष्ठा धौभडेल र डा. वीरेन्द्र मण्डल रहेका छन्।

संघका निवर्तमान अध्यक्ष (इमिडियट पास्ट प्रेसिडेन्ट)मा डा. नुवादत्त सुवेदी छन्।

मेडिको–लिगल सोसाइटी अफ नेपाल,   नेपालमा फरेन्सिक मेडिसिन र फरेन्सिक ओडोन्टोलोजीका क्षेत्रमा स्थापित पहिलो राष्ट्रिय व्यावसायिक संस्था हो। संस्था सन् २०१५ नोभेम्बर २७ मा दर्ता भएको हो।

संघले नेपालमा मेडिको–लिगल अभ्यासलाई व्यवस्थित र एकरूप बनाउने उद्देश्यले विभिन्न गतिविधि गर्दै आएको छ। यसले अटोप्सी (शव परीक्षण), क्लिनिकल फरेन्सिक मेडिसिन तथा यौन दुर्व्यवहारसम्बन्धी परीक्षणका विषयमा तालिम तथा क्षमता अभिवृद्धिका कार्यक्रम सञ्चालन गर्दै आएको छ।