वीर र सेनाको अस्पतालमा आज बालबालिकालाई फाइजर खोप दिईंदै
काठमाडौँ, १८ पुस । स्वास्थ्य कार्यालय काठमाडौँले आज वीर अस्पताल र छाउनीस्थित नेपाली सेनाको अस्पतालमा १२ देखि १७ वर्ष उमेर समूहका बालबालिकालाई फाइजर खोप दिने भएको छ । स्वास्थ्य कार्यालयले ती दुई अस्पतालमा अहिले विहान ९ बजे देखि अपरान्ह ३ बजेसम्म खोप दिइने बताएको छ ।
यसअघि पहिलो डोज लगाईसकेर दोस्रो डोज लगाउन बाँकी बालबालिकालाई यो खोप दिने भएको हो । यद्धपी खोप बाँकी रहने अवस्था आएमा पहिलो डोज समेत लगाईने स्वास्थ्य कार्यालयले जनाएको छ ।
स्वास्थ्य कार्यालय काठमाडौंका प्रमुख शम्भु काफ्लेले यसअघि पहिलो डोज लगाएका तर दोस्रो डोज लगाउन बाँकी १२ देखि १७ वर्ष उमेरका बालबालिकालाई आज वीर र छाउनी अस्पतालमा खोप लगाउने व्यवस्था मिलाइएको बताए ।
उनले खोप बाँकी रहेको खण्डमा पहिलो डोज पनि दिन सक्ने संकेत गरे ।
‘यसको भण्डारणको कारणले गर्दा पहिले आएर रहेको खोप सक्नुपर्ने अवस्था छ । त्यसैले हामीले आएकाहरुलाई खोप दिने नीति लिएका छौँ,’ उनले भने ।
सरकारले काठमाडौँ सहित २० जिल्लामा १२ देखि १७ वर्ष उमेरका बालबालिकालाई कोभिडविरुद्ध फाइजर खोप दिने निर्णय गरेको थियो । त्यस अनुसार नयाँ अभियान सुरु भने भइसकेको छैन् ।
केही खोप आईसके पनि सिरिन्ज अभावको कारण यो अभियान रोकिएको बताइएको छ । फाइजर खोप एक महिनासम्म सामान्य तापक्रम २ देखि ८ डिग्री सेल्सियससम्म राख्न सकिने बताइएको छ । त्यसपछि भने यसको भण्डारण माइनस ७० डिग्री सम्मको चिसोमा भण्डारण गर्नुपर्ने हुन्छ ।
सरकारले ५७ वटा जिल्लाका बालबालिकाहरुलाई भने मोडर्ना खोप दिईरहेको छ ।
सम्पर्क इमेल : nepalihealthnews@gmail.com