भारतमा १५ देखि १८ वर्षका बालबालिकालाई कोभिडविरुद्धको खोप दिईदै

  • फ्रन्टलाइनर र ६० वर्ष माथिकाले बुस्टर डोज पाउने
  • - नेपाली हेल्थ

    नयाँ दिल्ली । भारतले आगामी ३ जनवरी देखि १५ देखि १८ वर्ष उमेरका बालबालिकाहरुलाई कोभिडविरुद्धको खोप दिने घोषणा गरेको छ ।

    प्रधानमन्त्री नरेन्द्र मोदीले शनिबार देशवासीका नाममा सम्वोधन गर्दै बालबालिकाहरुलाई खोप दिने घोषणा गरेका हुन् । भारतमा १५ देखि १८ वर्ष उमेर समूहका बालबालिकाको संख्या करीव ८ करोड रहेको बताइएको छ ।

    यस्तै प्रधानमन्त्री मोदीले आगामी १० जनवरीबाट फ्रन्टलाइन वर्कर ६० वर्ष माथिका नागरिकलाई अतिरिक्त डोज खोप दिने समेत घोषणा गरेका छन् ।

    भारतमा फ्रन्टलाइन वर्करको संख्या करीव ३ करोड रहेको बताइएको छ । ६० वर्ष माथिका नागरिकको संख्या करीव ११ करोड रहेको बताइएको हो ।

    कोभ्याक्सिन बालबालिकामा प्रयोग गर्न सकिने
    यसैबीच ड्रग कन्ट्रोलर जनरल अफ इन्डिया(डीसीजीआई)ले भारत बायोन्टेकले उत्पादन गरेको कोभिडविरुद्धको खोप कोभ्याक्सिनलाई इमरजेन्सी युजका लागि अनुमति दिएको छ । यो अनुमतिपछि यो खोप १२ देखि १८ वर्ष उमेरका बालबालिकालाई लगाउन सकिने बताइएको छ ।

    भारतले गत १६ जनवरीदेखि कोभिडविरुद्धको खोप सञ्चालन सुरु गरेको थियो । अहिलेसम्म १ अर्व ४१ करोड डोज खोप लगाईसकेको बताइएको छ । प्रधानमन्त्री मोदीले ६१ प्रतिशत बढीले पूर्ण खोप लगाईसकेको बताए । ९० प्रतिशतले पहिलो डोज लगाएको जानकारी दिए ।


    Facebook Comment


    थप समाचार