मौज्दात रहेको कोभिसिल्डबाट स्वास्थ्यकर्मी, सुरक्षाकर्मी र सरसफाईकर्मीलाई दोस्रो मात्रा दिइने
काठमाडौँ , ६ जेठ । सरकारले मौज्दात रहेको कोभिडबिरुद्धको खोप कोभिसिल्ड यसअघि दोस्रो मात्रा लगाउन छुटेका स्वास्थ्यकर्मी, सुरक्षाकर्मी र सरसफाईकर्मीलाई दिने निर्णय गरेको छ । यस्तै २३ फागुन अघि पहिलो प्राथमिकतामा परी खोप लगाएका तर दोस्रो मात्रा लिन छुट भएका व्यक्तिले समेत पाउनेछन् ।
बुधबार स्वास्थ्य तथा जनसंख्या मन्त्रालयमा बसेको आइसीएस कमाण्डको बैठकले प्रदेश तथा जिल्लामा मौज्दात रहेको कोभिसिल्ड खोप कोभिड १९ को महामारीमा अग्रपंक्तिमा रहेर सेवा प्रदान गर्ने स्वास्थ्यकर्मी, सुरक्षाकर्मी र सरसफाईकर्मी लगायत २३ फागनु भन्दा अघि पहिलो प्राथमिकतामा परी दोस्रो मात्रा लिन छुट भएका व्यक्तिलाई दिने दिने निर्णय गरेको हो ।
बैठकले जिल्ला कोभिड -१९ खोप समन्वय तथा अनुगमन समितिबाट छिटो निर्णय गरी उपयुक्त समय निर्धारण गरी खोप सेवा सञ्चालन गर्न समेत अनुरोध गरेको छ ।
यस्तै बैठकले भेरोसेलको दोस्रो मात्रा सञ्चालन गरिएका काठमाडौँ उपत्यकाका तीन सहित अरु चारवटा जिल्लामा समय तालिका नबाझिने गरी कार्यक्रम सञ्चालन गर्न भनेको छ ।
अहिलेसम्म नेपालमा कोभिसिल्ड र भेरोसेल गरी पहिलो मात्रा खोप लिनेको संख्या २१ लाख बढी छ । दोस्रो मात्रा लिनेको संख्या ७ लाख नाघेको छ ।
सम्पर्क इमेल : nepalihealthnews@gmail.com