काठमाडौँ, १८ साउन । स्वास्थ्य मन्त्रालयले क्षेत्रगत रुपमा गर्दै आएको बार्षिक समिक्षा गोष्ठी यसपटक देखि प्रदेश स्तरमा गर्ने भएको छ ।

संघीयताको कार्यान्वनय गर्ने नीति अनुरुप मन्त्रालयले समिक्षा गोष्ठी क्षेत्रबाट परिवर्तन गरि प्रदेशस्तरमा गर्न लागेको हो ।

स्वास्थ्य मन्त्री गिरिराजमणी पोखरेलले मन्त्रालय र विभागका जिम्मेबार अधिकारीहरुलाई यसपटकको बार्षिक समिक्षा गोष्ठी प्रादेशिक संरचना अनुसार गर्ने गरि मिलाउन निर्देशन दिइसकेका छन् । सोही अनुसार मन्त्रालय तथा विभागले तयारी थालेका छन् ।

यसअघि पाँच विकास क्षेत्रमा हुन्थ्यो । यसपटक देखि प्रदेश स्तरीय समिक्षा हुने कुरा छ । हामी त्यसैको तयारीमा लागेका छौँ । मन्त्रालयका एक अधिकारीले बताए ।

प्रदेशमै गर्ने कि केन्द्रमा गर्ने टुंगिन बाँकी
यसअघि क्षेत्रीय दरमुकाममा गई समिक्षा गर्दै आएको मन्त्रालयले प्रदेशको टुंगो लागि नसकेका कारण कहाँ गएर गर्ने भन्नेमा अलमल छ । ‘पाँच वटा प्रदेशका लागि त पाँच विकास क्षेत्र भएकै ठाँउमा गएर गर्न सकिएला बाँकी दुईवटा प्रदेशमा कहाँ गर्ने ? त्यसैले ठाँउ तोकिएको छैन,’ स्रोतले भन्यो ।

काठमाडौँमै पनि हुनसक्ने
‘स्वास्थ्य मन्त्रीले छिटो छरितो र प्रभावकारीका लागि यसपटक सात वटै प्रदेशको समिक्षा केन्द्रमै गर्ने कि भन्ने विकल्प पनि अघि सारेका छन् । सो विषयमा पनि छलफल भईरहेको छ,’ स्रोतले भन्यो । मन्त्रालयले भदौको पहिलो साता देखि बार्षिक समिक्षा सुरु गर्ने तयारीमा छ ।