काठमाडौँ,६ माघ । सरकारले अबदेखि नर्स, चिकित्सक लगायत स्वास्थ्यकर्मीहरु र स्वास्थ्य सेवा अन्तर्गतका अन्य कर्मचारीहरुलाई पनि ओभरटाइम भत्ता दिने निर्णय गरेको छ ।

मन्त्रीपरिषदको आज बसेको बैठकले अतिरिक्त सुबिधा अर्थात् ओभरटाइम भत्ता दिने निर्णय गरेको हो ।

यसअघि सरकारले सबै स्वास्थ्य संस्थाहरुमा ओपीडी सेवा ९ बजेदेखि ५ बजेसम्म सञ्चालन गर्न निर्देशन दिएपछि स्वास्थ्यकर्मीहरुले त्यसबापत अतिरिक्त भत्ता पाउनुपर्ने सर्त राख्दै आएका थिए ।

सरकारले स्वास्थ्य मन्त्रालय मातहतका निकायमा कार्यरत चिकित्सक, नर्स, स्वास्थ्यकर्मी तथा अन्य कर्मचारीका लागि सेवा शर्त र सुविधा सम्वन्धी कार्यविधी स्वीकृत गरेर भत्ताको व्यवस्था गरिदिएको हो ।

स्वीकृत कार्यविधी अनुसार स्वास्थ्य सेवा अन्तर्गतका कर्मचारीहरुलाई कार्यालय समयभन्दा अतिरिक्त काम गरेवापत अतिरिक्त सुविधा दिनेछ । यो सुविधा कर्मचारी, चिकित्सक, स्वास्थ्यकर्मी, नर्सहरुलाई उपलब्ध गराउनेछ । तर यस्तो अतिरिक्त भत्ता तलबको ५० प्रतिशतभन्दा बढी हुने छैन ।