आज देशभर १ लाख ६५ हजार बढीले कोभिडबिरुद्धको खोप लगाए
काठमाडौँ, २३ फागुन । कोभिड १९ बिरुद्धको खोप अभियान अन्तरगतको दोस्रो चरणको पहिलो दिन आज १ लाख ६५ हजार ४२८ जनाले खोप लगाएका छन् । सरकारले आजबाट ६५ बर्ष माथिका जेष्ठ नागरिक र यसअघि छुटेका स्वास्थ्यकर्मीहरुले खोप दिने व्यवस्था मिलाएको थियो ।
स्वास्थ्य सेवा विभाग परिवार कल्याण महाशाखा अन्तरगर्त खोप शाखाका प्रमुख डा झलक गौतमले दोस्रो प्राथमिकताको पहिलो चरण आजबाट शुरु भएको भन्दै पहिलो दिन १ लाख ६५ हजार ४२८ जनाले खोप लगाएको बताए । उनले आज ३७४ वटा पालिकाका २ हजार ४१९ वटा खोप केन्द्र सञ्चालनमा आएको बताए ।
डा गौतमका अनुसार ६५ बर्ष माथिका जेष्ठ नागरिकको संख्या १६ लाख बढी रहेको छ । करीब १० दिन भित्र यो संख्यालाई खोप लगाईसकेपछि ५५ देखि ६४ बर्ष उमेर समूहका व्यक्तिलाई खोप दिने स्वास्थ्य मन्त्रालयको योजना छ ।
यसैबीच आजै प्रधानमन्त्री केपी शर्मा ओली, गृहमन्त्री रामबहादुर थापा बादल, अर्थमन्त्री विष्णु पौडेल, उद्योगमन्त्री लेखराज भट्ट, परराष्टमन्त्री प्रदीप ज्ञवाली लगायतले खोप लगाएका छन् ।
यो संगै देशभर आजसम्म ६ लाख ४ हजार २६७ जना नेपालीले पहिलो डोज खोप लगाइसकेका छन् ।
सम्पर्क इमेल : nepalihealthnews@gmail.com