काठमाडौँ, १३ मंसिर । क्रिकेटर सन्दीप लामिछानेलाई कोरोना संक्रमण देखिएको छ । उनले शनिबार बिहानै सामाजिक सन्जाल ट्वीटरमार्फत् आफूलाई कोरोना संक्रमण देखिएको पुष्टि गरेका छन् ।

लामिछानेका अनुसार गत बुधबारदेखि उनलाई शरीर दुख्ने समस्या देखिएको थियो । तर अहिले स्वास्थ्यमा सुधारका क्रममा रहेको उनले बताएका छन् ।

आफू अहिले होम आइसोलेसनमा रहेको जानकारी दिँदै सन्दीपले लेखेका छन्, ‘यदि सबै राम्रो हुँदै गए म छिटै फिल्डमा पुनः फर्किने छु । तपाईंहरु मलाई आशिर्वाद दिनुस् ।’