कोरोनालाई जितेर घर फर्किइन् बागलुङ की ६५ वर्षीया वृद्धा
बागलुङ, ६ बैशाख । नेपालकी छैटौँ कोरोना सङ्क्रमित महिलालाई कोरोना निको भएको छ । उनी आजै बेलुका धौलागिरी अस्पतालबाट डिस्चार्ज भएकी छन् ।
बागलुङ नगरपालिका–३ गौडाकोटकी ६५ वर्षीया कोरोना सङ्क्रमित महिलाको तेस्रो र चौथो पटकको रिपोर्ट नेगेटिभ अर्थात् कोरोना निको भएको आएपछि १७ दिनदेखि उपचाररत उनको डिस्चार्ज भएको हो ।
गत चैत ४ गते बेल्जियमबाट कतार हुँदै बागलुङ आएकी उनलाई चैत १७ गते कोरोना सङ्क्रमण भएको पुष्टि भएपछि धौलागिरि अञ्चल अस्पतालको आइसोलेशनमा भर्ना गरी उपचार भइरहेको थियो ।
कोरोना सङ्क्रमण भएको पुष्टि भएपछि धौलागिरि अञ्चल अस्पतालको आइसोलेशन वार्डमा उपचाररत महिलाको यसभन्दा पहिले दुई पटक स्वाब परीक्षण गर्दा पोजेटिभ आए पनि तेस्रो र चौथौ पटक नेगेटिभ आएका कारण उनलाई कोरोना ठीक भएको गण्डकी प्रदेश स्वास्थ्य कार्यालयका प्रमुख सुरज गुरौँले जानकारी दिए ।
संक्रमितको सूचीमा छैटौँ भएपनि निको हुनेको सूचीमा उनी तेस्रो भएकी छन् ।
नेपालमा आजसम्म ३१ जनामा कोरोना संक्रमण देखिएको छ ।
सम्पर्क इमेल : [email protected]