काठमाडौँ, १ मंसिर । सम्पत्ति शुद्धीकरण अनुसन्धान विभागले तीनवटा मेडिकल कलेजमा छापा मारेको छ । शिक्षा मन्त्रालय र राष्ट्रिय सतर्कता केन्द्रको प्रतिवेदनका आधारमा विभागले भरतपुरस्थित चितवन मेडिकल कलेज, वीरगञ्जमा रहेको नेशनल मेडिकल कलेज र विराटनगरस्थित नोवेल मेडिकल कलेजमा छापा मारेको हो ।

पछिल्लो समय निजी मेडिकल कलेजहरु विद्यार्थीहरुसंग सरकारले तोकेभन्दा बढी शुल्क लिएको भन्ने विवादमा परेका छन् । विद्यार्थीहरुले बढी शुल्क लिने निजी कलेजविरुद्ध आन्दोलन गरिरहेका बेला विभागले छापा मारेको हो ।

‘हामीले कलेज र कलेज सञ्चालको समेत सम्पत्तिको बारेमा अनुसन्धान गर्दैछौँ ,’स्रोतले भन्यो ।

यता शिक्षा मन्त्रालयले भने बढी शुल्क लिने कलेजहरुलाई ठगी मुद्धा चलाउन गृहमन्त्रालयलाई निर्देशन दिईसकेको छ ।