काठमाडौँ, ६ फागुन । चिकित्सा विज्ञान राष्ट्रिय प्रतिष्ठान (न्याम्स)को उपकुलपति रिक्त भएको आज १९५ दिन भयो तर नियुक्तिको अन्योलता कायमै छ । नियुक्ति हुन अझै कति दिन लम्बिने हो एकीन गर्न सकिने अवस्था छैन ।

न्याम्सका सहकुलपति समेत रहेका उपप्रधान एवं स्वास्थ्य तथा जनसंख्या मन्त्री उपेन्द्र यादव संयोजक रहेको सर्च कमिटिले गत १ असोजमै उपकुलपतिका लागि सम्भावित ३ जनाको नाम नियुक्तिका लागि सिफारिस गरेको थियो ।

सिफारिसको एक नम्बरमा प्राडा डीएन साह, दुई नम्बरमा प्राडा ढुण्डी पौडेल र तीन नम्बरमा प्राडा अजित रायमाझीको नाम छ । तर त्यो सिफारिसको २१ हप्तासम्म पनि कुलपतिबाट उपकुलपति नियुक्ति हुन सकेको छैन ।

उपकुलपति नियुक्तिमा किन ढिलाई  ?
सत्ता साझेदार दुई दलबीच पदाधिकारीमा भागबण्डा नमिल्दा उपकुलपति नियुक्ति रोकिएको हो । स्वास्थ्य तथा जनसंख्या मन्त्रालय सम्हालेको संघीय समाजवादी फोरमले मन्त्रालय अन्तरगर्तको न्याम्समा आफ्नो हक लाग्ने भन्दै मुख्य पदहरुमा आफ्नो दावी गरेको छ ।

यता सरकारकै नेतृत्व गरेको नेपाल कम्युनिष्ट पार्टी (नेकपा)ले सबै पद दिन चाहेको छैन् । उसले समानुपातिक रुपमा मुख्य पदहरुको बाँडफाँड हुनुपर्छ भन्दै आएको छ । कुलपति र सहकुलपतिबीचको बेमेलले उपकुलपति नियुक्तिमा ढिलाई भएको हो ।

के के मा भएको छ बेमेल ?
यतिवेला न्याम्स अन्तरगर्तका विभिन्न ७ वटा छ वटा पद रिक्त छ । उपकुलपति, रेक्टर, रजिष्ट्रार, डीन, वीर अस्पतालको निर्देशक र राष्ट्रिय ट्रमा सेन्टरको निर्देशक । अबको केही समयमा न्याम्सको एक जना कार्यकारी सदस्य पनि रिक्त हुँदैछ ।

बालुवाटार स्रोतका अनुसार फोरमले उपकुलपति र बीर अस्पतालको निर्देशक सहित एक जना सदस्य आफ्नो हुनुपर्ने अडानमा छ । नेकपा भने उपकुलपति र वीर अस्पतालको डाइरेक्टर मध्ये एक पद आफ्नो हुनुपर्ने पक्षमा छ । फोरमले त्यो भागबण्डा नमानेपछि उपकुलपति नियुक्तिमा ढिलाई भएको हो ।

‘हामीले मुख्य मानिने उपकुलपति र वीर अस्पतलाको डाइरेक्टर मध्ये एउटा पद बाँढौँ भनेका हौँ । त्यसबेला उहाँहरुलाई कार्यकारी मानिने ती दुबै पद चाहिने भन्नु भयो । त्यसले डेढलक जस्तो भएको हो । अब भने उहाँहरु पनि गम्भीर हुनुभएको छ । छिटै केही निकास निस्कन्छ ‘ स्रोतले भन्यो ।

उपकुलपतिमा डीएन साह निर्विकल्प !?
फोरमले मुख्य पद मानिने उपकुलपति र वीरको निर्देशक आफै राखेर अरु पदमा भागवण्डा गर्न सकिने भनेपछि नेकपाले उपकुलपति र वीरको निर्देशक आफूलाई राखेर अरु सबै पद लैजान फोरम समक्ष प्रस्ताव पठाएको थियो ।

तर फोरमले त्यो प्रस्तावलाई ठाडै अस्विकार गरेको थियो । फोरमले कुनै हालतमा डीएन साहलाई उपकुलपति बनाएरै छाड्ने योजनामा देखिएको छ ।

उपकुलपतिमा डीएन साह बाहेक अरु हुनै सक्दैन भन्ने हरेक पटकको छलफलमा उहाँहरुले उठाउने गर्नु भएको छ । प्रधानमन्त्रीले त्यसो भए अरु पदहरुमा हामीले भनेको पनि मान्नुस भन्नु भएको हो । यसैमा अडकिएको हो । स्रोतले भन्यो ।

त्यसो त वाहिरबाट उपकुलपति ल्याए आफूहरुलाई मान्य नहुने भन्दै बीर अस्पतालका चिकित्सकहरुले आन्दोलनको धम्की दिईरहँदा नेकपाले दोस्रो नम्बरमा सिफारिस भएका ढुण्डी पौडेललाई समेत अघि सारेको थियो । तर फोरम त्यसमा सहमत भएको छैन ।

नियुक्ति खाने चर्चामा को को छन ?
फोरमले उपकुलपतिमा डीएन साहको नाम अघि सारेको छ, त्यस्तै डा प्रमोद यादव, डा सिताराम चौधरी समेत अघि सारेका नामहरु हुन् ।

यता नेकपा तर्फबाट नियुक्तिका लागि डा. केदार सेन्चुरी, डा यहुनचन्द्र सिवाकोटी, डा विधाननिधी शर्मा, डा पियुस दाहाल, डा सन्तोष पौडेल लगायतको चर्चा छ ।

यता प्रधानमन्त्री कार्यालयबाट डा दिलीप शर्मा र स्वास्थ्य मन्त्रालयको तर्फबाट डा भुपेन्द्रकुमार बस्नेतको नाम पनि नियुक्तिको लिष्टमा परेको छ । तर यी मध्ये क कसले नियुक्ति पाउने हुन र को को नयाँ थपिने हुन् त्यो भने एकीन भईसकेको छैन ।