काठमाडौँ, ६ असोज । क्षतिपूर्ति पुर्ती तिराउने मन्त्रिपरिषदको निर्णयविरुद्ध देशभरका चिकित्सकहरु आन्दोलनमा उत्रिएका बेला स्वास्थ्य मन्त्रालयले मन्त्रिपरिषदले गरेको निर्णय सार्वजनिक भएको छ ।

नेपाली हेल्थलाई प्राप्त निर्णय कपीमा गत २ असोजको मन्त्रिपरिषद बैठकले ‘चिकित्सकको चरम लापरबाहीको कारणले बिरामीको मृत्यु भएमा वा अंगभंग भएमा घटनाको स्वतन्त्र अनुसन्धान गर्न, पेशागत व्यवसायिक विमा र क्षतिपूर्ति लगायतका आवश्यक विषयहरुलाई व्यवस्थित गर्न मन्त्रालयलाई निर्देशन दिने’ भनिएको छ ।

यसअघि स्वास्थ्य मन्त्री गिरिराजमणि पोखरेलले सरकारको निर्णयमा क्षतिपूर्ति तिर्नुपर्ने विषय नभएको बताइसकेका थिए ।

चिकित्सकहरुले भने मन्त्रिपरिषदले निर्णय सच्याएको जानकारी नआएसम्म आज देखि देशव्यापी रुपमा अस्पताल बन्द गरी विरोधमा उत्रिने घोषणा गरिसकेका छन् ।