काठमाडौँ, ४ फागुन । स्वास्थ्य सेवा विभाग बाल स्वास्थ्य महाशाखाले स्थगित पोलियोरोग विरुद्धको खोप  खुवाउने कार्यक्रम १४ र १५ फागुनलाई प्रस्ताव गरेको छ । यद्धपी स्वास्थ्य मन्त्रालयले यसको औपचारिक निर्णय गरिसकेको छैन  ।

यसअघि ७ र ८ फागुनका लागि तोकिएको पोलियो खुवाउने कार्यक्रम सीअहेव र हेल्थ असिस्टेन्ट(हेअ) बीचको आपसी द्धन्द्ध र मन्त्रालय केन्द्रीत आन्दोलनका कारण स्थगित भएको थियो । १० बर्षे द्धन्द्धकालमा समेत स्थगित नभएको खोप कर्मचारीको आन्दोलनका कारण स्थगित भएपछि सरकारकै आलोचना भएको थियो ।

बालस्वास्थ्य महाशाखाका निर्देशक डा विकास लामिछानेले पोलियो खुवाउने नयाँ तालिका १४ र १५ फागुनका लागि प्रस्ताव गरेर मन्त्रालयमा पठाएको बताए । उनले मन्त्रालयले निर्णय नगर्दासम्म सो मिति नै एकीन भएको मान्न भने नसकिने स्पष्ट पारे ।

यता मन्त्रालयका प्रवक्ता भोेगेन्द्रराज डोटेलले विभागको औपचारिक रुपमा आईनसकेको भन्दै त्यसको निर्णय हुन बाँकी रहेको बताए । ‘पहिले पत्र आएपछि मात्रै यसको निर्णय हुन्छ । अहिलेसम्म पत्र आईपुगेको छैन,’ प्रवक्ता डोटेलले भने ।

सरकारले देशका यसबर्ष पनि काठमाडौँ उपत्यका सहित देशका १५ जिल्लामा ५ बर्ष मुनिका १६ लाख ९२ हजार ३१५ जना बालबालिकालाई पोलियोरोग विरुद्धको खोप दिने योजना छ ।