त्रिवि शिक्षण अस्पतालको निर्देशकका लागि नाम सिफारिस गर्न नयाँ सर्च कमिटि
काठमाडौँ, २२ असोज । त्रिभुवन विश्वविद्यालयले महाराजगञ्जस्थित शिक्षण अस्पतालको निर्देशकका लागि नाम सिफारिस गर्न तीन सदस्यीय सर्च कमिटि गठन गरेको छ । विश्वविद्यालयले चिकित्साशास्त्र अध्ययन संस्थान (आइओएम)का डीन प्राडा जगदीशप्रसाद अग्रवालको संयोजकत्वमा तीन सदस्यीय कमिटि गरेको हो ।
कमिटिका सदस्यहरुमा प्राडा अभिमन्यु झा र सह प्राडा प्रदीप ज्ञवाली रहेका छन् ।
यसअघि गत जेठको पहिलो साता पनि निर्देशकको नाम सिफारिस गर्न त्रिविले डीन अग्रवालकै संयोजकत्वमा सर्च कमिटि बनाएको थियो । सो कमिटिमा प्राडा जीवन शेरचन र सहप्राडा रमेशसिंह भण्डारी सदस्य थिए । तर सो कमिटिले तीन महिना पछि आफूहरुले नाम सिफारिस गर्न नसक्ने भन्दै त्रिवि समक्ष पत्र पठाएको थियो ।
अघिल्लो कमिटि खारेज गरेको करीब एक महिना पछि त्रिविले प्राडा अग्रवालकै अगुवाईमा दोस्रो कमिटि गठन गरेको हो ।
‘हामीले गत साता नै नयाँ कमिटि बनाएका छौँ । यसले कहिले नाम सिफारिस गर्छ । त्यसपछि निर्देशक नियुक्तिको टुंगो लाग्छ,’ उपकुलपति प्राडा तिर्थ खनियाले भने ।
अघिल्लो कमिटिले नाम सिफारिस गर्न किन सकेन ?
त्रिवि कार्यकारीले गत ८ जेठमा प्राडा अग्रवालको संयोजकत्वमा तीन सदस्यीय सर्च कमिटि गठन गरेको थियो । तर अग्रवालले गत ६ भदौमा त्रिवि कार्यकारीलाई आफ्नो टिम नाम सिफारिस गर्न अक्षम रहेको व्यहोराको पत्र पठाएका थिए । त्रिविले उनको पत्रपछि सो टिमलाई विगटन गरेको थियो । अहिले पुन उनैको संयोजकत्वमा दुई जना नयाँ सदस्य राखेर टिम गठन भएको छ ।
त्यसबेला प्राडा वाइपी सिंह, प्राडा ईश्वर लोहनी, प्राडा दिनेश काफ्ले, प्राडा प्रदीप बैद्य, प्राडा दिनेश विनोद पोखरेल आदि पाँचको नाम मापदण्ड अनुसार मिलेकोले कमिटिले उनीहरुसंग अन्तरवार्ता समेत लिएको थियो ।
चार बर्ष पूर्ण कार्यकाल रहेका, बरिष्ठ प्राध्यापक, कार्यकुशलता, अनुभव आदि मापदण्ड बनाई आवेदन मागेको मागेको कमिटिले उनीहरुसंग अन्तरवार्ता समेत लिएको थियो । त्यसका आधारमा पहिलो दोस्रो र तेस्रो स्थानमा नम्बर ल्याउनेलाई सिफारिस गर्ने गरी मापदण्ड बनाइएको थियो । तर कमिटिका तीन जनाबीचमा नामका विषयमा एकमत नहुँदा सिफारिस गर्न नसकेको हो ।
अहिले त्रिविको निमित्त निर्देशकको जिम्मेवारी आइओएमकी सहायक डीन प्राध्यापक मन्दिरा वन्तले सम्हालेकी छन् ।
सम्पर्क इमेल : nepalihealthnews@gmail.com
loktantra bhaneko natak tantra rahechh. aba ta prof. agrawal saksham bannechhan kinaki prof kc ko asirbaad paeko anubhav bhayo