काठमाडौँ, ३ माघ । स्वास्थ्य तथा जनसंख्या मन्त्रालयमा मन्त्री नेकपा एमाले र राज्यमन्त्री राष्ट्रिय स्वतन्त्र पार्टीलाई दिने सूचना सोमबार बेलुका नै चुहिएको थियो । तर मन्त्री र राज्यमन्त्री फरक पार्टीलाई के देलान भनेर धेरैलाई यो सूचनाको विश्वास लागेको थिएन । विश्वास नलागे पनि भयो त्यै ।

मंगलबार विहान नेकपा एमालेका तर्फबाट पर्वत क्षेत्र नं १ बाट प्रतिनिधि सभा सदस्य पदमा निर्वाचित पदम गिरी स्वास्थ्य मन्त्रीको रुपमा छानिए । राष्ट्रिय स्वतन्त्र पार्टीका तर्फबाट ललितपुर ३ बाट प्रतिनिधि सभा सदस्यमा निर्वाचित डा तोसिमा कार्की राज्यमन्त्रीमा छानिईन् ।

सोमबार राती १० बजे उच्चस्तरीय राजनीतिक संयन्त्रको बैठक बाट बाहिरिदै गर्दा राष्ट्रिय स्वतन्त्र पार्टीका सभापति रबि लामिछानेले दिउसो १ बजे नयाँ मन्त्रीहरुलाई सपथ खुवाईने बताएका थिए । तर मंगलबार विहान फेरी सपथ साढे ११ बजेलाई तोकियो भन्ने खवर सार्वजनिक भयो । यद्धपी सपथ ग्रहणको कार्यक्रम सकिदा झण्डै साढे १२ बजेको थियो ।

स्वास्थ्य मन्त्री पदम गिरी र राज्यमन्त्री डा तोसिमा कार्की करीव १ बजे मन्त्रालय प्रवेश गरे ।  संगै थिईन स्वास्थ्य सचिव देवकुमारी गुरागाईँ पनि ।

सधै जस्तै नयाँ मन्त्री तथा राज्यमन्त्रीको स्वागतका मन्त्रालयका कर्मचारीहरु बुके लिएर प्रांङ्गणमा लामवद्ध भएका थिए । मन्त्री तथा राज्यमन्त्री दुबैले स्वागत ग्रहण गर्दै आ आफ्नो कार्यकक्षमा प्रवेश गरे ।

दुबैले सधै जस्तै स्वास्थ्यको एक महत्वपूर्ण निर्णयमा हस्ताक्षर गरे र पदवहालीको औपचारिकता पुरा गरे ।

त्यसपछि सञ्चारमाध्यमलाई स सानो प्रतिक्रिया दिए ।

पदवहालीपछि सधै जस्तै मन्त्री,  राज्यमन्त्रीलाई मन्त्रालयको हलमा लगियो । स्वास्थ्य सेवा विभागका महानिर्देशक महानिर्देशक डा दीपेन्द्ररमण सिंहले स्वागत मन्तव्य दिए । डा कृष्ण पौडेलले नीतिगत योजना सुनाए । ट्रेड युनियनको तर्फबाट बसन्त श्रेष्ठले धारणा राखे ।

त्यसपछि स्वास्थ्य राज्यमन्त्री डा तोसिमा कार्कीले आफ्नो भनाई राखिन् ।

त्यसपछि बोले स्वास्थ्य मन्त्री पदम गिरी । संविधानको धारा ३५ मा उल्लेखित स्वास्थ्यको मौलिक हकलाई कार्यान्वयन गर्ने विषयमा केन्द्रीत थियो । आम जनतालाई गुणस्तरीय स्वास्थ्य सेवा प्रदान गर्ने आफूहरुको लक्ष्य रहेको दुबैले बताएका थिए ।

त्यसपछि स्वास्थ्य सचिव गुरागाईँले कार्यक्रम समापन गरिन् ।

कार्यक्रम समापन लगत्तै मन्त्री गिरीले देशकै एक मात्र सरकारी केन्द्रीय बाल अस्पतालको आकस्मिक अनुगमनमा निस्किए । त्यहाँ पुगेर उनले अस्पताल प्रशासनलाई सेवा चुस्त राख्न निर्देशन दिए ।

• मन्त्रालय सम्हाले लगत्तै कान्ति अस्पतालको अनुगमनमा पुगे स्वास्थ्य मन्त्री गिरी, सेवा चुस्त बनाउन निर्देशन

निर्वाचन आयोगलाई पेश गरेको विवरणलाई आधार मान्ने हो भने नव नियुक्त स्वास्थ्य मन्त्री गिरीको उमेर ४५ वर्ष १० महिना ६ दिन पुगेको छ । यस्तै राज्यमन्त्री कार्कीको उमेर ३३ वर्ष ७ महिना २८ दिन पुगेको छ । यस हिसावले दुबै मन्त्रीहरुलाई युवा मन्त्री भन्न गाह्रो हुँदैन् । दुबैको काम गर्ने हुटहुटी साच्चिकै व्यवहारमा देखियो भने ‘लथालिंग’ देखिएको स्वास्थ्य सम्हालिन गाह्रो हुँदैन ।