काठमाडौँ, ८ मंसिर । भरतपुर अस्पतालको निमित्त मेडिकल सुपरीटेन्डेनको जिम्मेवारी डा जगन्नाथ तिवारीलाई दिईएको छ ।

स्वास्थ्य तथा जनसंख्या मन्त्रालयले सोमबार मन्त्रिस्तरीय निर्णय मार्फत रिक्त रहेको मेसु पदमा अर्को व्यवस्था नभएसम्मका लागि डा तिवारीलाई जिम्मेवारी दिने निर्णय भएको हो । उनी दशौँ तहका चिकित्सक हुन् ।

यसअघि मन्त्रालयले अढाई महिना पुगनपुग मेसु बनेका डा राजन पाण्डेले गत साता दिएको राजिनामा स्वीकृत गरेको थियो । राजिनामा दिदै गर्दा डा पाण्डेले डा तिवारीलाई नै निमित्त दिएका थिए ।

‘डा पाण्डेले राजिनामा दिएपछि पनि उहाँले नै निमित्तको रुपमा चलाउनु भएको हो तर आजको निर्णयले निमित्त भएपनि आर्थिक अधिकार सहितको जिम्मेवारी पाउनु भएको छ,’ अस्पतालका अध्यक्ष डा भोजराज अधिकारीले भने ।

मेडिकल जरनलिष्ट समूहका डा तिवारी यसअघि सो अस्पतालको आकस्मिक विभागका प्रमुख समेत हुन् ।