काठमाडौँ, २ भदौ । पछिल्लो चौबिस घण्टामा देशभर थप ७ जना कोरोना संक्रमितको मृत्यु भएको छ। देशभरका विभिन्न अस्पतालमा उपचाररत ७ जना कोरोना संक्रमितको मृत्यु भएको स्वास्थ्य तथा जनसंख्या मन्त्रालयका प्रवक्ता डा जागेश्वर गौतमले नियमित प्रेस ब्रिफिङमा जानकारी गराए।

काभ्रे, नेपालगञ्ज, मोरङ, धनुषा, नवलपरासी, कास्की र तनहुँमा एक एक जना कोरोना संक्रमितको मृत्यु भएको स्वास्थ्य मन्त्रालयका प्रवक्ता डा गौतमले जानकारी दिए।

यो सहित नेपालमा कोरोना संक्रमणबाट मृत्यु हुनेको संख्या ११४ पुगेको छ ।

त्यसैगरी नेपालमा मंगलवार थप १ हजार १६ जनामा कोरोना भाइरसको संक्रमण देखिएको छ। यो हालसम्मकै सबैभन्दा धेरै हो।

यो संगै  कोरोना संक्रमितको कुल संख्या २८ हजार २५७ पुगेको छ । हालसम्म सक्रिय संक्रमितको संख्या १० हजार ५६३ रहेको छ । पछिल्लो चौबिस घण्टामा कोरोना जितेर घर फर्कनेको संख्या ८५ रहेको छ ।