काठमाडौँ, १६ साउन । स्वास्थ्य बीमा बोर्डको कार्यकारी निर्देशकको नाम सिफारिस गर्न तीन सदस्यीय सर्च कमिटि गठन भएको छ । स्वास्थ्य तथा जनसंख्या मन्त्रालयले बिहीबार लोक सेवा आयोगको अध्यक्षको संयोजकत्वमा तीन सदस्यीय कमिटि गठन गरेको हो ।

समितिका अन्य सदस्यहरुमा डा सुरेश तिवारी र मन्त्रालय सचिव लक्ष्मण अर्याल छन् ।

खुल्ला प्रतिस्पर्धाबाट छनौट हुने कार्यकारी निर्देशक पदका लागि यो कमिटिले तीन जनाको नाम सिफारिस गर्ने र मन्त्रिपरिषद्ले त्यसबाट एक जनालाई कार्यकारी निर्देशकमा छनौट गर्ने गर्दछ ।

बोर्डका कार्यकारी निर्देशक रमेशकुमार पोखरेलले गत १७ असारमा राजिनामा दिएपछि सो पद रिक्त छ । उनको राजिनामा २५ असारमा बसेको मन्त्रिपरिषदले स्वीकृत गरेको थियो ।

अहिले बोर्ड निमित्त कार्यकारी निर्देशकको जिम्मेवारी स्वास्थ्य मन्त्रालयका सहसचिव डा राधिका थपलियाले पाएकी छन् ।