काठमाडौँ, २३ असार । झापा शिवगञ्ज पाँचगाछीकी दुरामती राजवंशीलाई अर्थ अभावमा मिर्गौला प्रत्यारोपण गर्नमा समस्या परेको छ ।

उनको दुवै मिर्गौला खराब भएको छ । उनका छोरा विश्वनाथले आमालाई मिर्गौला दिने भने तापनि प्रत्यारोषण गर्नका लागि रकम अभाव नै तगारो बनेको छ । उनले मानव अङ्ग प्रत्यापरोण केन्द्र भक्तपुरमा मिर्गौला प्रत्यारोपण गर्नका लागि रु पाँचदेखि छ लाख चाहिने भए पनि आफूसँग त्यति धेरै रुपैयाँ नभएको बताए ।

तीन महिनादेखि बिरामी रहेका दुरामतीको उपचार गाउँघरबाट ऋण सापट लिएर भइरहेको छ । अहिले बिपी कोइराला स्वास्थ्य विज्ञान प्रतिष्ठान, धरानमा उपचार गराइरहनुभएका दुरामतीको दुई वटै मिर्गौला खराब भएकाले प्रत्यारोपण गराउनुपर्ने चिकित्सक डा नवीन भट्टले बताए । उनका अनुसार अहिले दुरामतीले डाइलोसिस गराइरहेका छन् । रासस