काठमाडौँ, २३ बैशाख । राष्ट्रपति रामचन्द्र पौडेलले नेपाली चिकित्सकको विदेशिने क्रम बढ्नु चिन्ताको विषय भएको बताएका छन्। उनले बढ्दो विदेशिने क्रमलाई रोक्न सम्वन्धित पक्षले उपयुक्त कदम चाल्नु पर्नेमा जोड दिएका छन् ।

मंगलबार काठमाडौँमा आयोजना भएको चिकित्सा विज्ञान राष्ट्रिय प्रतिष्ठान (न्याम्स) को २३ औं वार्षिकोत्सव समारोहलाई सम्वोधन गर्ने क्रममा राष्ट्रपति पौडेलले स्वास्थ्य सेवामा सुधार हुँदाहुँदै पनि सम्पूर्ण जनशक्तिले पर्याप्त अवसर नपाएको भन्ने गुनासो आइरहेको बताए । उनले चिकित्सकहरु विदेशिने क्रम बढ्नु मा पनि त्यो एउटा कारण हुन सक्ने भन्दै चिन्ताको विषय भएको बताए । उनले भने, यसलाई रोक्न सम्बद्ध पक्षले उपयुक्त कदम चाल्नुपर्छ भन्ने म ठान्दछु ।’

राष्ट्रपति पौडेलले  संविधानको भावना अनुसार आम नागरिकको स्वास्थ्य सेवामा समान पहुँच पुर्‍याउन र स्वास्थ्य सेवाको गुणस्तरमा वृद्धि गर्न ध्यान केन्द्रित गर्न पनि सुझाब दिएका छन्।

‘हाम्रो संविधानले नेपाली नागरिकलाई स्वास्थ्य शिक्षा जस्ता आधारभूत आवश्यकताको सुनिश्चित गरेको छ। संविधानको भावना अनुसार आम नागरिकको स्वास्थ्य सेवामा समान पहुँच पुर्‍याउन र स्वास्थ्य सेवाको गुणस्तरमा वृद्धि गर्न हाम्रो ध्यान केन्द्रित हुनुपर्छ,’उनले भने, ‘राष्ट्रले दक्ष र विज्ञ चिकित्सक उत्पादनमा गरेको लगानी संविधानको त्यही भावना र मर्म अनुसार हो। संविधानको यो भावना र मर्मलाई आत्मसात गर्दै चिकित्सकहरुले यो पेशालाई सेवा भावको दृष्टिले हेर्नुहुन्छ भन्ने विश्वास लिएको छु।’

राष्ट्रपति पौडेलले न्याम्सले हालसम्म गरेको कामको प्रशंसा गर्दै आगामी दिनमा सेवा र चिकित्सा क्षेत्रमा थप सेवा विस्तार गर्न पनि सुझाब दिए। उनले नवप्रवर्दन र अनुसन्धानलाई प्रोत्साहन गर्न न्याम्सले निरन्तर सहयोग प्राप्त गरिरहन्छ भन्नेमा विश्वस्त रहेको पनि बताए।

स्वास्थ्य मन्त्री प्रदीप पौडेलले पछिल्लो २० वर्षमा नेपाल मेडिकल काउन्सिलमा चिकित्सकको संख्या ४ गुणा बढी दर्ता भएको देखिएको भन्दै तर त्यो जनशक्ति कहाँ छ भन्ने विषय मुख्य रहेको बताए । उनले जनशक्ति उत्पादनसंग उनीहरुलाई स्वदेशमै टिकाउनु अहिलेको चुनौती रहेको भन्दै उनीहरुलाई प्रोत्साहन तथा उन्नयनका बाटाहरुमा सहजीकरण गर्ने स्थिति निर्माण गर्न आवश्यक रहेको बताए ।

कार्यक्रममा न्याम्सका उपकुलपति प्राडा भुपेन्द्रकुमार बस्नेतले न्याम्सको स्थापना पछि यसले देशको स्वास्थ्य क्षेत्रमा पुराएको योगदानको चर्चा गरे ।

शिक्षाध्यक्ष डा लोचन कार्कीले न्याम्सको शैक्षिक कार्यक्रमबारेमा जानकारी दिएका थिए ।

यस्तै वीर अस्पतालका निर्देशक डा दिलिप शर्माले वीरले दिएको उपचार सेवाका बारेमा प्रस्तुतिकरण दिएका थिए ।