काठमाडौँ, २० बैशाख । एसोसिएशन अफ प्राइभेट मेडिकल एण्ड डेन्टल कलेज अफ नेपालका अध्यक्ष डा ज्ञानेन्द्रमानसिंह कार्कीले आन्दोलनरत आवासीय चिकित्सकहरुलाई कक्षामा फर्किन कलेजहरुका तर्फबाट कुनै अवरोध नभएको बताएका छन् ।

उनले बीचमा कक्षा छुटेको सम्वन्धमा विद्यार्थीहरुलाई सम्वन्धित विश्वविद्यालयबाट पत्र बनाएर ल्याउन भनिएको जानकारी दिएका छन् ।

चिकित्सा शिक्षा आयोगको १५ बैशाखमा सम्पन्न १८ औँ बैठकपछि आन्दोलनमा उत्रिएका पीजी रेजिडेन्टस्को समेत माग पुरा भएको उल्लेख गर्दै विद्यार्थीहरुले छुटेको अवधिको विषयमा विश्वविद्यालयबाट लेखाएर आउन आग्रह गरिएको बताए ।

‘पीजीमा एक दिन पनि गयल हुन पाईदैन, हरेक मिनेट मिनेट जोडिन्छ । किनभने पीजीमा घण्टा अवधी तोकिएको हुन्छ । एक दिन कम भए पनि डिउटी गरेर पुरा गर्नैपर्छ । यो पीजीको पाठ्यक्रममै उल्लेख भएको कुरा हो । आन्दोलन गएँ भनेर यत्तिकै त्यो अवधी जोड्न मिल्दैन । त्यसैले विश्वविद्यालयको पत्र हामीलाई चाहियो भनेको हो । त्यसैले विद्यार्थीहरुले विश्वविद्यालय जाने पत्र ल्याउने आफ्नो पढाईमा लाग्ने सकियो । मैले अध्यक्षको नाताले सबै कलेजलाई त्यो निर्देशन पनि दिईसकेको छु,’ डा कार्कीले भने ।

शुक्रबार मात्रै विभिन्न कलेजमा अध्ययन्रत पीजीका विद्यार्थीहरुले आन्दोलनमा गएकै कारण आफूहरुलाई कलेज प्रशासनले अध्ययनमा फर्किन अवरोध सिर्जना गरेको भन्दै स्वास्थ्य मन्त्री प्रदीप पौडेलको ध्यानाकर्षण गराएका थिए ।

• स्वास्थ्य मन्त्री पौडेल भन्छन्, ‘आयोगको निर्णय कार्यान्वयन नगरे निजी मेडिकल कलेजको सम्वन्धन खारेज हुनसक्छ’

त्यसपछि मन्त्री पौडेलले विद्यार्थीहरुलाई कलेज फर्किन अवरोध गर्न नमिल्ने भन्दै त्यस्ता गतिविधि कलेजहरुले गरि राखेमा सम्वन्धन नै खारेज पनि हुन सक्ने चेतावनी दिएका थिए ।

उनले चिकित्सा शिक्षा आयोगले तोकेको निर्वाहभत्ता उपलव्ध गराउनु पर्ने भन्दै अन्यथा मन्त्रालयबाट हुने सहयोग रोकिने बताए ।
नेपाल चिकित्सक संघका अध्यक्ष डा अनिल बिक्रम कार्कीले पनि विभिन्न कलेजहरुले विद्यार्थीहरुलाई डिउटीमा फर्किन अवरोध सिर्जना गरेको भन्दै सरकारले एक्सन लिनुपर्ने बताएका थिए ।

कलेजहरुमा विद्यार्थी फर्किन अझै सहज नभएको भन्दै संघले आज पनि माईतीघर मण्डलामा धर्नाको कार्यक्रम जारी नै राखेको छ ।