काठमाडौं, ११ भदौ । भोटेकोशी त्रिशुली बाढीबाट प्रभावित क्षेत्रमा स्वास्थ्य सेवा प्रभावित हुन नदिन अत्यावश्यक औषधी र स्वास्थ्य सामग्रीको नियमित तथा निर्बाध आपूर्ति सुनिश्चित गर्न नेपाल औषधी उत्पादक संघ (एपोन)ले सरकारसँग आग्रह गरेको छ।

एपोन अध्यक्ष बिप्लव अधिकारी र महासचिव सन्तोष बरालले आज विज्ञप्ती जारी गर्दै स्वदेशी औषधी उद्योग विपद्को समयमा राज्य र नागरिकको साथमा रहने बताएका छन् ।

साथै एपोनले बाढी तथा पहिरोले घरबस्ती, सडक, पुल, विद्युत्, सञ्चार, उद्योग–व्यवसाय, व्यापारिक संरचना, भन्सार तथा अत्यावश्यक वस्तुको आपूर्ति प्रणालीमा समेत असर पारेकाले खोज तथा उद्धार, राहत, उपचार र पुनर्स्थापनाका कामलाई तीव्र र प्रभावकारी बनाउन संघले सरकार, सुरक्षा निकाय, स्थानीय तह, निजी क्षेत्र तथा सरोकारवालासँग आग्रह संघले आग्रह गरेको छ ।

औषधी  मानव जीवनसँग प्रत्यक्ष जोडिएको अत्यावश्यक वस्तु भएकाले प्रभावित क्षेत्रको स्वास्थ्य आवश्यकता तत्काल पहिचान गरी अत्यावश्यक औषधी तथा स्वास्थ्य सामग्रीको पर्याप्त, नियमित र निर्बाध आपूर्ति सुनिश्चित गर्न स्वदेशी औषधी उद्योगहरू राज्य र नागरिकको साथमा पूर्ण रूपमा प्रतिबद्ध छन् , विज्ञप्तिमा भनिएको छ ।

त्यस्तै, विपद्बबाट प्रभावित उद्योगी, व्यवसायी, श्रमिक, कृषक तथा सर्वसाधारणको वास्तविक क्षतिको यथाशीघ्र मूल्याङ्कन गरी राहत, पुनर्स्थापना र पुनर्निर्माणका लागि विशेष आर्थिक तथा नीतिगत प्याकेज ल्याउन सरकारसँग संघले आग्रह गरेको छ।

विपद् सम्पूर्ण राष्ट्रको साझा पीडा भएकाले पीडितको उद्धार, उपचार, औषधी आपूर्ति र पुनर्स्थापना राज्य, निजी क्षेत्र र समाज सबैको साझा दायित्व भएको संघले जनाएको छ। सबै नेपाली एकजुट भएर विपद् प्रभावितको उद्धार, राहत तथा पुनर्स्थापनामा आ–आफ्नो ठाउँबाट योगदान गर्न पनि संघले आह्वान गरेको छ।