काठमाडौँ, २१ बैशाख । बाँकेको नेपालगञ्जमा थप ६ जनामा कोरोना संक्रमण पुष्टि भएको छ ।

स्वास्थ्य तथा जनसंख्या मन्त्रालयका सहप्रवक्ता डा समिर अधिकारीका अनुसार भेरी अस्पतालमा गरिएको परीक्षणमा उनीहरुमा कोरोना संक्रमण देखिएको हो । यो संगै नेपालमा कुल संक्रमितको संख्या ७५ पुगेको छ ।

पछिल्लो पटक संक्रमित हुनेहरुमा नेपालगञ्ज उपमहानगरपालिका ८ निवासी बर्ष १६, २१ र ३४ बर्षका पुरुष तथा बर्ष ४०, ५५ र ६० बर्षका महिलाहरु छन् ।

यसअघि आइतबार नै मन्त्रालयले ९ जनामा कोरोना संक्रमण भएको जानकारी दिएको थियो ।

केही दिनअघि नेपालगञ्ज उपमहानगरपालिकाका ६० वर्षका एक व्यक्तिमा कोरोना संक्रमण पुष्टि भएको थियो ।

ती ब्यक्तिको कन्ट्याक ट्रेसिङ गरेर ९० जनाको स्वाब संकलन गरी परीक्षणका लागि प्रयोगशाला लगिएको थियो । तीमध्ये परीक्षण भइसकेको नमुनामा अहिलेसम्म १५ जनामा कोरोना संक्रमण पुष्टि भएको छ ।

अधिकारीहरुले संक्रमणको संख्या थपनिसक्ने बताएका छन् ।