काठमाडौँ, ३० चैत । कोरोनाको सम्भावित संक्रमण रोक्न देशका विभिन्न ठाँउमा बनाइएका क्वारेन्टाइन तथा अस्पतालका आइसोलेसनमा रहेका ५ हजार १८४ जना पीसीआर टेष्ट भएको छ । यस्तै ३ हजार ३२१ जनाको रेपिड डाईग्नोस्टिक टेष्ट आरडीटी बाट जाँच गरिएको छ ।

आइतबार स्वास्थ्य तथा जनसंख्या मन्त्रालयले आयोजना गरेको कोरोना विशेष मिडिया अपडेटमा प्रवक्ता डा विकास देवकोटाले पछिल्लो २४ घण्टामा ७९५ जनाको पीसीआर टेष्ट गरिएको बताए ।

उनले सो क्रममा थप ३ जनाको रिपोर्ट पोजेटिभ देखिएको बताए । भारतबाट आएका ३७, ४४ र ५५ बर्षका तीन जना पुरुषमा कोरोना पोजेटिभ देखिएको हो । यो संगै नेपालमा कोरोना भाइरस संक्रमितको संख्या १२ पुगेको छ ।

यसैबीच डा देवकोटाले कोरोनाको जोखिम अझ बढेको भन्दै लकडाउनको पूर्ण पालना गर्न आम सर्वसाधारणसंग आग्रह गरेका छन् । उनले केस बढेसंगै चुनौती थपिएको भन्दै यसमा आम जनताको साथ सहयोग अपरिहार्य हुने समेत बताए ।