काठमाडौँ, २२ चैत ।  सरकारले बागलुङ, कैलाली र कंचनपुरमा र्‍यापिड टेष्ट किटबाट कोभिड १९ को परीक्षण गर्ने निर्णय गरेको छ । यी जिल्लाहरुमा संक्रमितको संख्या बढी हुन सक्ने भन्दै सरकारले र्‍यापिड टेष्ट किट मार्फत कोरोना परीक्षण गर्ने निर्णय गरेको हो ।

मन्त्रिपरिषदको बैठकले गरेको निर्णय सुनाउने क्रममा सरकारका प्रवक्ता डा युवराज खतिवडाले तीन जिल्लामा र्‍यापिड टेष्ट किट प्रयोगमा ल्याई एकैपटक धेरैको परीक्षण गर्ने योजनामा सरकार लागेको बताए ।

सरकारले यसैसाता चीनबाट ७५ हजार थान र्‍यापिड टेष्ट किट खरीद गरेको थियो । स्वासथ्य तथा जनसंख्या मन्त्रालयले महामारी फैलिएको अवस्थामा एकैपटक धेरैको जाँच गर्न पर्‍यो भने र्‍यापिड टेष्ट किट प्रयोगमा ल्याउने बताएको थियो ।

बागलुङमा दुई जना, कैलालीमा चार जना र कंचनपुरमा १ जनामा कोरोना भाइरस पोजेटिभ देखएिको छ ।