पोखरामा जडान भयो पोर्टेवल पीसीआर मेसिन, कोरोना भाइरस परीक्षण शुरु हुँदै
पोखरा , १८ चैत । अब पश्चिमाञ्चल क्षेत्रीय अस्पतालबाटै कोरोना भाइरस (कोभिड १९)को परीक्षण शुरु हुने भएको छ । राष्ट्रिय जनस्वास्थ्य प्रयोगशालाले पठाएको पोर्टेवल मेसिन पोखरा स्वास्थ्य विज्ञान प्रतिष्ठानकै प्रयोगशाला भवनमा जडान भएपछि कोरोना परीक्षण शुरु हुने भएको हो ।
प्रतिष्ठानका उपकुलपति प्राडा बुद्धिबहादुर थापाले पोर्टेवल मेसिन जडान भइसकेको र त्यसको एक पटक पुन परीक्षण (क्यालिव्रेसन) गर्ने काम हुँदै गरेकोले त्यसको रिजल्टपछि बेलुका वा भोलि विहानबाट परीक्षण शुरु गर्ने तयारी भएको बताए । उनले पोर्टेवलको सेवा शुरु भएपछि प्रतिष्ठानकै पुरानो ल्यावमा समेत कोरोना परीक्षण गरिने तयारी भएको जानकारी दिए ।
‘काठमाडौँबाट आज विहान पोर्टेवल मेसिन र प्राविधिकहरु चाहिने रिएजेन्ट तथा किटहरु लिएर आउनु भयो । मेसिन अहिले जडान समेत भइसकेको छ । अब त्यसको प्रारम्भिक परीक्षण पश्चात कोरोना परीक्षण शुरु हुन्छ,’ प्राडा थापाले भने ।
उनले पोर्टेवलले एक घण्टामा एक जनाको रिपोर्ट दिन सक्ने समेत जानकारी दिए । तर उनले प्रतिष्ठानमै रहेको ल्यावबाट एक घण्टामा २० देखि ३० जनाको रिपोर्ट दिनसक्ने जानकारी दिए ।
आज विहान नेपाली सेनाको हेलिकप्टरमार्फत पोखरामा पोर्टेवल मेसिन ल्याइएको थियो ।
प्राडा थापाले प्रतिष्ठानलाई कोरोना पोजेटिभ भएको उपचार गर्ने अस्पताल तोकिएको भन्दै आइसोलेसन र क्वारेन्टाइन अन्यत तोकिएको बताए । उनले अहिलेसम्म पोखरा क्षेत्रमा थुप्रै क्वारेन्टाइनमा बसेपनि आइसोलेसनमा रहेको खबर आफूले नपाएको बताए ।
सम्पर्क इमेल : [email protected]