काठमाडौँ, २७ माघ । स्वास्थ्य तथा जनसंख्या मन्त्रालयले कर्मचारी समायोजन काम अबको तीन दिन भित्र सक्ने बताएको छ । स्वास्थ्य तथा जनसंख्या मन्त्री भानुभक्त ढकालको कडा निर्देशन पछि कर्मचारी समायोजन अन्तरगर्त गठन भएको गुनासो व्यवस्थापन एवं सहजीकरण समितिले माघ मसान्त भित्र समायोजनको काम टुंग्याउने योजनाको साथ काम भएको जनाएको छ ।

गत असार देखि शुरु भएको स्वास्थ्यको कर्मचारी समायोजन एक पछि अर्को गर्दै लफडामा फस्दै गएको थियो । समितिका संयोजक महेन्द्रप्रसाद श्रेष्ठले अहिले पनि झण्डै ४ हजार कर्मचारीको समायोजन मिल्न बाँकी रहेको बताए ।

तर मन्त्री ढकालले समायोजनको बहानामा स्वास्थ्य सेवा प्रवाहमा अफ्टेरो परेको र नयाँ योजना अघि बढाउन समेत गाह्रो भएको भन्दै समायोजनको काम तत्काल टुंग्याउन कडा निर्देशन दिएका थिए । ‘मन्त्री ज्यूले माघ मसान्त भित्र समायोजन सक्न निर्देशन दिनुभएको छ । हामीले त्यहि रफ्तारमा काम गरेका छौँ । तोकिएकै समयमा समायोजन सकिएको घोषणा गर्ने हाम्रो योजना छ,’ श्रेष्ठले भने ।

उनले समायोजनमा नमिलेका भनिएका ४ हजार मध्ये करीब १ हजार पद घटुवाहरु कानूनी रुपमा मिलेर आउने, अरु नमिलेका करीब १ हजार जतिको मिलाइएको र बाँकी दुई हजारको बारेमा काम हुँदै गरेको बताए ।

समायोजनको काम पहिले संघीय मामिला तथा सामान्य प्रशासन मन्त्रालयले लिएको थियो । तर उसले झनै विगारेपछि यो काम अहिले स्वास्थ्य आफैले गर्दै आएको छ ।