काठमाडौँ, ७ असोज ।  स्वास्थ्य तथा जनसंख्या मन्त्रालयले स्वास्थ्यकर्मीहरुको बैयक्तिक विवरण (पीआईएस)मा भएको पदनाम बमोजिम समायोजन पत्र दिन अनुमति पाउ भनेर मन्त्रिपरिषदरमा प्रस्ताव दर्ता गराएको हो ।

पदनाम अनुसार पदस्थापन भईसकेका कतिपय कर्मचारीको समायोजनको क्रममा सामान्य प्रशासन मन्त्रालयले घटुवा गरिदिएपछि स्वास्थ्यकर्मीहरु आन्दोलित थिए । सामान्यको सो निर्णयले कर्मचारीको मनोवल समेत नबढ्ने भन्दै स्वास्थ्यले सामान्यको निर्णय सच्याएर पीआईएसमा भएको पदनाम बमोजिम नै समायोजन पत्र पठाउन अनुमति दिन माग गरेको हो ।

‘सबै कर्मचारीको पदनाम अनुसार पदस्थापन भएको थिएन । यसले स्वास्थ्यकर्मीहरुको मनोवलमा समेत असर गर्ने जस्तो पनि देखियो । यसैले हामीले सामान्य प्रशासन मन्त्रालयले यसअघि गरेको निर्णय सच्याउनु पर्छ भनेका छौँ । हामीले अहिले पत्र पठाउँदै गर्दा पीआईएस अनुसार पठाउन पाउँ भनेर मन्त्रिपरिषद समक्ष प्रस्ताव दर्ता गराएका छौँ,’ मन्त्रालयका कर्मचारी प्रशासन महाशाखा प्रमुख शिबराम न्यौपानेले भने ।

यसअघि पदनाम अनुसार समायोजन पत्र नपाएपछि स्वास्थ्यकर्मीहरुले आन्दोलन चर्काउने बताएका थिए । उनीहरुले समायोजनमा आफूहरुको घटुवा गरेको आरोप लगाएका थिए । स्वास्थ्यकर्मीहरुको दवाव पछि स्वास्थ्य मन्त्रालयले मन्त्रिपरिषद गुहारेको हो ।

हुन पनि योग्यता नपुगेको भन्दै सामान्यले दफा ९ (१) बमोजिम स्तरबद्धि भएका पाँचौ छैटौँ र सातौँ तहका कतिपय कर्मचारीहरुको पुरानै पदनाम तोकेको थियो । यसले अहेवबाट स्तरबृद्धि भई एचए भएका कर्मचारी फेरी अहेवमै झरेका थिए ।