काठमाडौँ, २२ बैशाख । नेपाल नर्सिङ संघले विरामीको सेवामा रातदिन खटिने दक्ष नर्सहरुको तलव राज्यले तोकेको न्युनतम बेतन भन्दा पनि कम हुने गरेको भन्दै सरोकारवालाहरुको ध्यानाकर्षण गराएको जनाएको छ । संघका अध्यक्ष प्राध्यापक तारा पोखरेलले निजी क्षेत्रका अस्पताल तथा नर्सिङ होमले राज्यले तोकेको न्युनतम दर भन्दा पनि कममा काम लगाउने गरेको ध्यानाकर्षण गराएकी हुन् ।

अन्तराष्ट्रिय मिडवाईफ्री दिवसको अवसरमा मिडवाईफ्रि सोसाईटी अफ नेपाल मिडसनले राजधानीमा आयोजना गरेको कार्यक्रममा बोल्दै अध्यक्ष पोखरेलले अस्पताल र नर्सिङहोमका सञ्चालकहरुलाई जिम्मेबार हुन आग्रह गरिन् । ‘राज्यले न्युनतम तलव ९ हजार तोकेको अवस्था छ तर नर्सहरुको तलव अहिले पनि आठ हजार छ । के यो न्यायोचित हो ? यति लगानी गरेर यतिका बर्ष पढेर दक्ष स्वास्थ्यकर्मीको उपमा पाएकाहरुको श्रमको मूल्य जम्मा ८ हजार ?’ उनले प्रश्न गरिन ।

‘नर्सहरुलाई अहिले पनि कतिपय स्वास्थ्य संस्थामा भोलेन्टियरको रुपमा राख्ने गरेको पाइएको छ । तलव दिएकाहरुले पनि अति नै कम न्युनतम भन्दा पनि कम तलव दिने गरेका छन् । यस्तासंस्थालाई राज्यले कारबाहीको दायरामा ल्याउनुपर्छ । अस्पतलाहरुको मापदण्ड हेर्दै गर्दा नर्स विरामी रेसियो, तलवको रेसियो पनि हेर्नुपर्छ,’ उनले भनिन् ।

उनले मासिका पदमा जागिर खाएकाहरुलाई अनमीको पदनाम दिएको भन्दै राज्यले विना लाईसेन्सका नर्सहरुबाट काम गराईरहेको आरोप लगाइन् । सेवा अवधीको आधारमा तलव बढाउन ककिएला तह पनि बढाउन सकिएला तर पदनाम दिन हुँदैन मिल्देन ।

लामो समयपछि देशमा मिडवाईफ्रि विषयको पढाई हुन थालेको भन्दै नर्सको जस्तो बेरोजगारी हुनुपर्ने अवस्था नल्याउन राज्यले अहिले देखिनै तयारी थाल्नुपर्ने बताइन् ।

मिडसनका अध्यक्ष प्राध्यापक किरण बज्राचार्यले लामो प्रयासपछि नेपालमा मिडवाईफ्रि विषयको अध्ययन हुन थालेको भन्दै मिडवाई फ्रिहरुको व्यवस्थापनका लागि राज्यले नीति बनाउनुपर्ने बताइन् । उनले दक्ष प्रसुतिकर्मी उत्पादन भएपछि मात्रै मातृ तथा शिशु मृत्युदरमा कमी हुने दावी गरिन् ।

कार्यक्रममा सहभागीहरुले मिडवाईफहरुको महत्वको बारेमा बोलेका थिए ।