स्वास्थ्यकर्मीलाई पोलियो खोपमा सहभागी भईदिन स्वास्थ्य विभागको अपिल

- नेपाली हेल्थ

काठमाडौँ, १५ फागुन । स्वास्थ्य सेवा विभागले देशका १५ जिल्लामा आउदो २१ र २२ फागुनमा हुन लागिको पोलियो खुवाउने कार्यक्रममा सहभागी भईदिन स्वास्थ्यकर्मी समक्ष अपिल गरेको छ ।

९ (ख) कार्यान्वनयको माग राख्दै आन्दोलनमा उत्रिएका स्वास्थ्य सम्वद्ध केही ट्रेड युनियनहरुले माग पुरा नभए आगामी खोप कार्यक्रम समेत बहिस्कार गर्ने चेतावनी दिएपछि विभागको यस्तो अपिल आएको हो । यसअघि ७ र ८ फागुनको पूर्वनिर्धारित पोलियो थोपा खुवाउने अभियान स्वास्थ्यकर्मीको आन्दोलनकै कारण स्थगित भएको थियो ।

विभागका निमित्त महानिर्देशक डा राजेन्द्र पन्तद्धारा जारी अपिलमा भनिएको छ, ‘खोपको माध्यमाबाट अपांगता रुग्णता तथा अकाल मृत्यु हुनबाट जोगाउन सकिन्छ तसर्थ२१ र २२ फागुनमा गर्न लागिएको पोलियो थोपा खुवाउने कार्यक्रममा सदा झैँ सक्रिय सहभागीताको लागि सम्पूर्ण स्वास्थ्यकर्मी, महिला स्वास्थ्य स्वयंसेविका तथा सम्पूर्ण सरोकारवाला समक्ष हार्दिक अपिल गर्दछ ।’

त्यसो त नेपालले पोलियो रोग उन्मुलनको लागि सन २०१४ – २०१८ को अन्तिम रणनीति पनि पारित गरिसकेको छ ।उन्मुलनको संघारमा पुगेको स्थितिमा पोलियो खोप अभियान अन्त्यन्त महत्वपूर्ण मानिन्छ ।

अपिलमा खोप पाउनु बालबालिकाको नैसर्गिक अधिकार भएको र २०५३ साल देखि पोलियो निरन्तर रुपमा सफलतापूर्वक चलेको समेत उल्लेख गरिएको छ ।

आगामी २१ र २२ फागुनमा काठमाडौँ उपत्यका सहित कैलाली, बाँके, कपिलवस्तु, पर्सा, बारा, रौतहट, महोत्तरी, धनुषा, सिरहा, सप्तरी र सुनसरी सहितका जिल्लामा पाँच बर्ष मुनिका १६ लाख बालबालिकालाई पोलियो थोपा खुवाउने कार्यक्रम छ ।


Facebook Comment


थप समाचार