स्वास्थ्य चौकीको नेतृत्व छैटौँले गर्ने कि पाँचौँले ?

- नेपाली हेल्थ

काठमाडौँ,१० माघ । स्तरबृद्धि भई छैटौँ तहमा पुगेका सीअहेवले स्वास्थ्यचौकीमा पाँचौँ तहको हेल्थ असिस्टेन्टको मातहतमा रहेर काम गर्न परेको भन्दै स्वास्थ्य मन्त्रालय केन्द्रीत आन्दोलन सुरु गरेको महिना दिन पुग्न लाग्यो तर माग सम्वोधन हुने संकेत अझै देखिएको छैन् ।कहिलेसम्म समाधान हुन्छ भन्ने अवस्था पनि छैन् ।

सीअहेवको माग सम्वोधन गर्दा विगतमा जस्तै हेल्थ असिस्टेन्टहरुले अर्को आन्दोलन चर्काउने डरले पनि मन्त्रालयले माग सम्वोधन गर्न आलटाल गरेको हो । तर माग सम्वोधन नगर्दा र स्वास्थ्यकर्मीहरु कार्यस्थल छोडी काठमाडौँ आउँदा त्यसको प्रत्यक्ष असर भने सेवाग्राहीमा पर्ने देखिन्छ ।

त्यसो त स्तरबृद्धि भएकाहरुलाई पदस्थापन गर्ने दरबन्दी नभएको र अर्गानोग्राममा स्वास्थ्य चौकी इन्चार्ज एचए हुने प्रावधान रहेकोले ऐनमै संसोधन नगर्दासम्म समाधान नहुने मन्त्रालयका अधिकारीहरु बताउछन् । यद्धपी स्वास्थ्य मन्त्री गगन थापाले बीचको बाटो खोजेर भएपनि माग सम्वोधनको प्रक्रिया अघि बढाउन कर्मचारीहरुलाई निर्देशन दिएका छन् ।

मन्त्रालयका उपसचिव बाबुराम खनालले समस्या स्वास्थ्य सेवा ऐनको दफा ९, दफा ९ ख र दफा १७ को कार्यान्वयनमा भएको बताए । दफा ९ अनुसार स्तरबृद्धि भयो तर दफा १७ अनुसार जिम्मेबारी अनुसार पदस्थापन हुन सकेन् । किनकी पदस्थापन गर्न दरबन्दी छैन् ।

उनले पटक पटक आन्दोलन हुन थालेपछि मन्त्रालयले स्थायी समाधानका लागि विकल्पबारे अध्ययन गरेको बताए । ‘हामीले के हुन सक्छ भने विभिन्न विकल्पहरु अध्ययन गरेका छौँ । त्यसको त्यसको प्रतिवेदन स्वास्थ्य मन्त्री समक्ष बुझाईसकेका पनि छौँ । मन्त्रीज्यूले उपयुक्त निर्णय लिनुहोला,’ उपसचिव खनालले भने ।

यसअघि स्तरबृद्धि भई पदस्थापन नभएका स्वास्थ्यकर्मी र स्वास्थ्य सचिव डा सेनेन्द्रराज उप्रेतीबीच पटक पटक बार्ता भएको थियो । सो बार्तामा समाधानका उपायहरुबारे छलफल मात्रै भएको बताइन्छ ।


Facebook Comment


थप समाचार