नेपाली हेल्थ / काठमाडौँ-

स्वास्थ्य सेवा विभाग परिवार स्वास्थ्य महाशाखाको निर्देशकको जिम्मेबारी डा. रामपदारथ (आरपी) बिच्छाले पाएका छन् । स्वास्थ्य मन्त्रालयको मंगलबारको मन्त्रीस्तरीय निर्णयले डा. बिच्छालाई सो जिम्मेबारी दिएको हो । यसअघि डा बिच्छा कान्ति बाल अस्पतालमा बालरोग विशेषज्ञको रुपमा कार्यरत थिए ।

यसैगरी मंगलबारको बैठकले सुदुरपश्चिम क्षेत्रीय स्वास्थ्य निर्देशकको जिम्मेबारी डा. सुशील प्याकुरेललाई दिने निर्णय गरेको छ । पूर्वाञ्चल क्षेत्रीय निर्देशक रहँदा अख्तियारले आर्थिक हिनामिनाको आरोप लगाएपछि उनी केही समय निलम्वनमा समेत परेका थिए । छानवीनपछि केही महिना अघि मात्रै सफाई पाएका डा. प्याकुरेलले जिम्मेबारी पाएका थिएनन् ।

मन्त्रालय प्रशासन महाशाखा प्रमुख रघुराम विष्टले मंगलबारको बैठकले एघारौँ तहको पदमा दुई जनाको जिम्मेबारी हेरफेर गरेको र केही अस्पतालका चिकित्सकहरुको समेत जिम्मेबारी हेरफेर गरेको बताए ।