काठमाडौँ, ८ जेठ । नेपालमा कोरोना संक्रमणबाट मृत्यु हुनेको संख्या तीन पुगेको छ । गत १ जेठ देखि रुपन्देहीको मणिग्रामस्थित क्रिमसन अस्पतालमा उपचाररत गुल्मी मदानेका ४१ बर्षिय पुरुषको आज विहान ज्यान गएको हो ।

सामाजिक विकास मन्त्रालय, प्रदेश नं ५ का स्वास्थ्य सेवा प्रमुख डा उमाशंकरप्रसाद चौधरीले क्रिमसन अस्पतालमा उपचाररत कोरोना संक्रमित पुरुषको आज विहान ७ १० मा निधन भएको पुष्टी गरे ।

‘अस्पतालले औपचारिक रुपमा हामीलाई जानकारी गराएको छ । अव स्थानीय प्रशासन र सम्वन्धित सरोकारवालाबीच मृतकको शब व्यवस्थापन गर्ने प्रक्रिया अघि बढेको छ,’ डा. चौधरीले भने ।

एक्युट निमोनिया, जण्डिस बिग्रेको अवस्थामा परिवारले गत १ जेठ राती क्रिमशन अस्पताल पुरयाएको थियो । त्यहाँ लगेको केही समय पछि नै उनलाई आइसीयू वार्डमा राखेर भेन्टिलेटरको सहयोगमा उपचार भइरहेको थियो । उनको लक्षण कोरोनासंग मिल्ने भएपछि अस्पतालले २ जेठमा परीक्षणका लागि नमूना झिकेको थियो । ५ जेठमा उनमा कोरोना पोजेटिभ भएको रिपोर्ट आएको थियो ।

यो संगै कोरोनाबाट मृत्यु हुनेको संख्या ३ पुगेको छ । गत १ जेठमा धुलिखेल अस्पतालमा सिन्धुपाल्चोककी २९ बर्षीया सुत्केरी र २ जेठमा बाँके नरैनापुरका २५ बर्षीय युवकको कोरोनाबाट ज्यान गएको थियो ।