काठमाडौँ, ९ भदौ । स्वास्थ्य सेवा विभाग व्यवस्थापन महाशाखाको निर्देशकको जिम्मेवारी डा बिरेन्द्रकुमार मण्डलले पाएका छन् । उनी यसअघि गजेन्द्र नारायण सिंह अस्पताल राजबिराजमा मेडिकल सुपरीटेन्डेन्टको रुपमा कार्यरत थिए ।

मण्डललाई व्यवस्थापन महाशाखामा लगेपछि मन्त्री मेहताले त्यहाँ निर्देशक रहेका केशवराज पण्डितलाई मन्त्रालय तानेकी छन् ।

व्यवस्थापन अन्तर्गतको आपूर्ति व्यवस्थापन शाखाबाट ठूला ठूला खरीदका कामहरु हुने गर्दछन् । पहिले निकै रोजाइको ठाउँ मानिने त्यस शाखामा अहिले भने कर्मचारीहरुलाई पठाउन गाह्रो हुने गरेको बताइन्छ । खरीदमा फस्ने हो कि भन्ने डरले त्यहाँ जान आनाकानी गर्ने गरेको कर्मचारीहरु बताउँछन् ।

मन्त्री मेहताले यसअघि नीति योजना तथा अनुगमन महाशाखाको प्रमुखमा डा विवेककुमार लाललाई जिम्मेवारी दिएकी छिन्। यस्तै उक्त महाशाखामा रहेका डा गुणनीधि शर्मालाई राष्ट्रिय क्षयरोग केन्द्रमा र केन्द्रमा रहेका डा भुवन पौडेललाई मन्त्रालयमा सरुवा गरेकी छन् ।