काठमाडौँ, ६ मंसिर । चिकित्सा शिक्षा आयोगमा चार जना निर्देशक नियुक्ति गरिएको छ । नियुक्ति गरिएकामा प्राडा दिलिप शर्मा, प्राडा रमेश आचार्य, प्राडा संगरत्न बज्राचार्य र प्राडा आरती शाह छन् ।

आयोगका अध्यक्ष एवं प्रधानमन्त्री केपी शर्मा ओलीसंगको परामर्स पछि आयोगका उपाध्यक्ष प्राडा श्रीकृष्ण गिरीले उनीहरुलाई निर्देशकमा नियुक्ति गरेका हुन् ।

उपाध्यक्ष गिरीले चार जना निर्देशकलाई विहीबार नै नियुक्तिसंगै जिम्मेवारी समेत हस्तान्तरण गरेका छन् । जस अनुसार
मापदण्ड तथा प्रत्यायन निर्देशनालयमा प्राडा शर्मा , योजना, समन्वय तथा प्राज्ञिक उन्नयन निर्देशनालयमा प्राडा आचार्य, परीक्षा निर्देशनालयमा प्राडा संगरत्न बज्राचार्य र नेसनल बोर्ड अफ मेडिकल स्पेसियालिटिजमा प्राडा आरती शाहलाई जिम्मेवारी दिइएको हो ।

गत कात्तिक २९ गते समितिका संयोजक डा उषा झाले उपाध्यक्ष गिरी समक्ष चार जनाको नाम सिफारिस गरेकी थिइन । निर्देशकको पदावधी चार बर्षको हुनेछ ।