काठमाडौँ, २३ भदौ । जिल्ला जिल्लाबाट बीसीजी खोप लगाउने सुई अभाव भईरहेको खवर आएका बेला स्वास्थ्य सेवा विभागले आत्तिनु पर्ने अवस्था नभएको जनाएको छ । उसले ७ लाख ५५ हजार थान सुई चीनबाट आउदै गरेको बताएको छ ।

स्वास्थ्य सेवा विभाग बाल स्वास्थ्य महाशाखाले भदौ भरलाई पुग्ने गरी स्थानीय स्वास्थ्य संंस्थामा सुई रहेको र असोज पछि आउदै गरेको सुईले काम चल्ने बताएको छ ।

बाल स्वास्थ्य महाशाखा अन्तरगतको खोप शाखा प्रमुख कृष्णबहादुर चन्दले केही जिल्लाका स्टोरहरुमा बीसीजी खोप लगाउने सुई नभएको तर स्थानीय खोप केन्द्रमा भने प्रयाप्त रहेको बताए । उनले भने, जिल्लाका स्टोरमा सुई छैनन् । तर स्वास्थ्य चौकी तथा प्राथमिक स्वास्थ्य केन्द्रहरुमा छ । यो महिनालाई पुग्छ ।

आपूर्ति व्यवस्था महाशाखाका उपसचिव बाबुराम पौडेलले अभाव भएको भन्ने हल्ला मात्रै भएको भन्दै अहिले बीसीजी खोप तथा सुईको अभाव नभएको बताए ।