काठमाडौँ, १७ भदौ । त्रिभुवन विश्वविद्यालयले काठमाडौँ नेशनल मेडिकल कलेजको सम्वन्धन तत्कालका लागि स्थगित गरेको छ । आज बसेको त्रिवि कार्यकारी परिषदको बैठकले मेडिकल कलेज तथा शिक्षण अस्पतालको मापदण्ड पुरा छ कि छैन भन्ने अध्ययन गर्न एक समिति बनाउँदै सो समितिको प्रतिवेदन नआउँदासम्मका लागि सम्वन्धन स्थगित गर्ने निर्णय गरेको हो ।

त्रिविले काठमाडौँ नेशनल मेडिकल कलेज अवस्था अध्ययन गर्न कानून संकायका प्राध्यापक सनत देवकोटाको संयोजकत्वमा तीन सदस्यीय समिति गठन गरेको छ । सो समितिमा त्रिभुवन विश्वविद्यालयका प्रशासन तर्फका कर्मचारी पर्शुराम कोइराला र मेडिकल तर्फका डा प्रशान्त भट्ट सदस्य रहेका छन् । सो समितिलाई एक साता भित्र प्रतिवेदन बुझाउन कार्यदेश दिइएको त्रिवि उपकुलपति प्राडा तिर्थ खनियाले बताए ।

‘हामीले आज मुख्य त तीनवटा निर्णय गरयौँ पहिलो हामीले दिएको सम्वन्धन नितान्त कार्यकारी परिषदको निर्णय हो । यसमा कुलपति वा अन्य कुनै राजनीतिक दल र तीनका नेतालाई दोश दिनु पर्दैन । योे हाम्रो आफ्नो क्षेत्र भित्र पर्ने कुरा हो । दोस्रो हामीले काठमाडौँ नेशनल मेडिकल कलेजले सञ्चालन गरेको हस्पिटलको बारेमा स्वास्थ्य मन्त्रालयसंग सोधपुछ गरयौँ र सोध्यौँ त्यहाँ स्वीकृति लिएको छ कि छैन ?स्वास्थ्यले छैन भन्यो । त्यसपछि हामीले अर्को निर्णय गरयौँ । यी सबै विवाद र बास्तविकता के हो ? एक पटक फेरी हेरौँ भनेर । एक हप्तामा उहाँहरुले रिपोर्ट दिनुहुन्छ । त्यतिन्जेल सम्मका लागि सम्वन्धन स्थगित छ,’ प्राडा खनियाले भने ।

अदालतको आदेश भन्दै त्रिवि कार्यकारी परिषदको गत १२ साउनमा बसेको बैठकले घट्टेकुलोमा रहेको काठमाडौँ नेशनल मेडिकल कलेजलाई सम्वन्धन दिने निर्णय गरेको थियो । सो निर्णय एकदमै विवादित बनेको थियो ।