काठमाडौँ, १४ भदौ । निजी मेडिकल कलेज तथा डेन्टल कलेज सञ्चालकहरुको संस्था एसोसिएसन अफ प्राईभेट मेडिकल एण्ड डेन्टल कलेज अफ नेपालले एमबीबीएस र बीडीएसमा सिट बढाउने चिकित्सा शिक्षा आयोगको निर्णयलाई स्वागत गर्दै थप सिट बृद्धिका लागि माग गरेको छ ।

आयोगका अध्यक्ष समेत रहेका प्रधानमन्त्री केपी ओलीको अध्यक्षमा गत २९ साउनमा बसेको आयोगको २१ औँ बैठकले एमबीबीएसको अधिकतम १०० बाट बढाएर १३० सिट र बीडीएसको अधिकतम ५० बाट बढाएर ६० पुरयाउने निर्णय गरेको थियो ।

एसोसिएसनका अध्यक्ष डा. ज्ञानेन्द्रमानसिंह कार्कीले शुक्रबार जारी गरेको विज्ञप्तीमा नेपालका अधिकांश सरकारी तथा निजी मेडिकल तथा डेन्टल कलेजहरुको भौतिक पूर्वाधार, अत्याधुनिक उपकरण , दक्ष जनशक्ति तथा शैक्षिक बातावरणको पूर्ण उपयोग हुन एमबीबीएसमा न्युनतम १५० सिट र बीडीएसमा न्युनतम १०० सिट तोकिदा मात्र सम्भव हुने उल्लेख छ ।

विज्ञप्तीमा अहिले पनि स्रोत साधनको प्रयाप्त प्रयोग हुन नसक्ने र ठूलो मात्रामा पूर्वाधार खेर जाने परिस्थिति उत्पन्न भएको भनिएको छ । ‘त्यसैले एमबीबीएस तर्फ न्युनतम १५० सिट र बीडीएस तर्फ न्युनतम १०० सिट तोक्नु उपयुक्त मात्र नभई अनिवार्य भएको हामी विश्वास गर्दछौँ,’ विज्ञप्तीमा भनिएको छ ।

एसोसिएसनले विगतमा पनि १५० सिट एमबीबीएस पढाएको र गुणस्तरमा कतै समस्या नभएको समेत उल्लेख गरेको छ ।

खाली सिटमा विदेशी विद्यार्थी भर्ना गर्न पाईयोस

एसोसिएसनले नेपालमा अपर्याप्त सिट संख्याका कारण कैंयौँ विद्यार्थी चिकित्सा शिक्षाका लागि विदेशीएको उल्लेख गरेको छ । उनीहरुलाई स्वदेशमै गुणस्तरीय शिक्षा प्रदान गर्न सकुन र अध्ययनका लागि राष्ट्रिय पूँजी देश बाहिर जाने अवस्था नबनोस समेत भनेको छ ।

तर, उसले सिट बढेको अवस्थामा पुरा सिट नभरिए भारतीय विद्यार्थीहरुलाई पढाउन मिल्ने गरी नीतिगत व्यवस्था गरिदिन समेत आग्रह गरेको छ । ‘छिमेकी मुलुक भारतबाट हरेक वर्ष ८ लाख विद्यार्थी चिकित्सा शिक्षाका लागि विदेश जाने गरेका छन्, नेपालमा उपलव्ध भौगोलिक अवस्था, हावापानी, शैक्षिक गुणस्तर, शैक्षिक प्रणाली, पूर्वाधार, सामाजिक संरचना तथा रोगव्याधिको स्वरुप भारतसंग अत्यन्त मिल्दोजुल्दो भएकोले उनीहरुलाई नेपालमा ल्याउन सकिने,’ समेत विज्ञप्तीमा भनिएको छ ।

हेर्नुहोस विज्ञप्ती: