काठमाडौँ, १३ भदौ । वीरगञ्जमा थप ७७ जनामा हैजा पुष्टि भएको छ । यो संगै जिल्लामा कुल संक्रमितको संख्या ७१२ पुगेको छ ।

स्वास्थ्य कार्यालय पर्साका जनस्वास्थ्य अधिकृत जयमोद ठाकुरले आज बेलुका ६ बजेको पछिल्लो तथ्यांक सार्वजनिक गर्दै भनेका छन्, ‘संक्रमित बिरामीहरुको सरकारी तथा निजी गरी १८ वटा स्वास्थ्य संस्थामा १९५ जनाको उपचार भईरहेको छ । ती मध्ये ३३ जना आईसीयू र ४ जना एचडीयूमा छन् । अहिलेसम्म ५१७ जना भने अस्पतालबाट डिस्चार्ज भएका छन् ।’

गत २८ साउन देखि फाटफुट रुपमा झाडापखलाका बिरामी देखा परे पनि गत साता देखि प्रकोपको रुप लिएको थियो । परीक्षणका क्रममा उनीहरुमा हैजा भएको पुष्टि भएको थियो । झाडा पखलाबाट दुई जनाको मृत्यु भएको भनिए पनि हैजाबाट मृत्यु भएको पुष्टि भएको छैन ।

ठाकुरका अनुसार अहिले पनि सबैभन्दा बढी नारायणी अस्पतालमा १४ जना आईसीयू सहित कुल ९७ जनाको उपचार भईरहेको छ । त्यसपछि ४ आईसीयू, २ एचडीयू सहित कुल ३५ जनाको तराई अस्पतालमा उपचार भईरहेको छ ।

यस्तै नेशनल मेडिकल कलेजमा ३ आईसीयू, १ एचडीयू सहित कुल १३ जना बिरामीको उपचार भईरहेको छ भने प्रभु अस्पतालमा १०, सर्बोत्तम अस्पतालमा ८ गरी विभिन्न अस्पतालमा कुल १९५ जनाको उपचार भईरहेको छ ।

केही दिनसम्म पर्साको वीरगञ्ज महानगरपालिका भित्र देखिएको यो केश अहिले छिमेकी जिल्लाहरुमा पनि देखिन थालेको छ ।

हैजा नियन्त्रणका लागि संघीय, प्रदेश र स्थानीय तहका सरकारहरुले मिलेर काम गरेका छन् । विश्व स्वास्थ्य संगठनले प्राविधिक तथा औषधी उपचारका लागि सहयोग गर्दै आईरहेको छ ।