काठमाडौँ, १४ जेठ । स्वास्थ्य मन्त्री प्रदीप यादव विश्व स्वास्थ्य संगठनको ७७ औँ सभामा सहभागी हुन मंगलबार विहानै स्विट्जरल्याण्डको जेनेभा तर्फ जाने भएका छन् । सर्बोच्च अदालतमा दायर रिटको आज सुनुवाई नभएपछि उनी त्यसतर्फ जान लागेका हुन् ।

मन्त्री यादवका निजी सचिव भक्तराज जोशीले मंगलबार विहान २१५ बजे कतार एयरको उडानबाट दोहा हुँदै उनी जेनेभा जान लागेको बताए ।

यसअघि उनी शनिबार विहानै त्यसतर्फ जाने तालिका थियो । तर विशेष काम परेको भन्दै उनले त्यसदिनको भ्रमण कार्यक्रम स्थगित गरेका थिए । उनी नजाने भएपछि शनिबार विहान २१५ बजे स्वास्थ्य सेवा विभागका महानिर्देशक डा संगिता मिश्रा, स्वास्थ्य मन्त्रालय समन्वय महाशाखा प्रमुख डा चुमनलाल दास र स्वास्थ्य मन्त्री यादवका विज्ञ सल्लाहकार अवधेशकुमार दास त्यसतर्फ गई सकेका छन् ।
जोशीले मन्त्री मंगलबार विहान एक्लै त्यसतर्फ जान लागेको बताए ।

विश्व स्वास्थ्य सभा भने आजबाट जेनेभामा सुरु भइसकेको छ । सो सभामा मन्त्री यादवले आजै सम्वोधन गर्ने कार्यक्रम थियो । सभा १ जुनसम्म चल्नेछ ।