बंगलादेशबाट ३० हजार भाइल रेम्डेसिभिर ल्याउन अनुमति
काठमाडौँ, १० बैशाख । सरकारले कोरोना संक्रमितको उपचारमा प्रभावकारी मानिएको औषधि रेम्डेसिभिर ३० हजार भाइल बंगलादेशबाट ल्याउने भएको छ । औषधि व्यवस्था विभागले एक साता भित्र तोकिएको भाइल रेम्डेसिभिर ल्याउने गरी हाम्रो मेडि कन्सर्न र आयान हेल्थ केयर प्रालिलाई आयात अनुमति दिएको छ । ती कम्पनीहरुले क्रमश बेक्सिम्को फर्मास्यिुटिकल्सबाट २० हजार भाइल र इन्सेक्ट्रा बंगलादेशबाट १० हजार भाइल ल्याउनेछन् ।
‘संक्रमण बढ्दै गएको अवस्थामा भारतले रेम्डेसिभिर निर्यातमा प्रतिवन्ध लगाएको अवस्थामा नेपालमा अभाव हुन नदिन हामीले बंगलादेशबाट ल्याउनका लागि अनुमति दिएका हौ्र । आगामी एक साता भित्र औषधि आईसक्छ,’ विभागका महानिर्देशक भरत भट्टराईले भने ।
गत कात्तिकमा पनि हाम्रो मेडि कन्सर्नले बेक्सिम्कोबाट १० हजार भाइल रेम्डेसिभिर औषधि ल्याइसकेको छ ।
पछिल्लो समय देशमा संक्रमण बढदै जाँदा कोरोनाका लागि प्रभावकारी मानिएको रेम्डेसिभिरको अभाव भएको छ । चिकित्सकहरुले सो औषधिको व्यवस्था मिलाउन स्वास्थ्य मन्त्रालयसंग अनुरोध गर्दै आएका थिए ।
सम्पर्क इमेल : nepalihealthnews@gmail.com