एजेन्सी । भारतमा कोरोना संक्रमणले नयाँ रेकर्ड राखेको छ । आइतबार एकै दिन एक लाख बढी नयाँ संक्रमण देखिएको छ । केन्द्रीय स्वास्थ्य मन्त्रालयका अनुसार आइतबार कुल १ लाख ३ हजार ७९४ जनामा कोरोना संक्रमण देखिएको छ ।

सो दिन ५२ हजार ८४० जना संक्रमित निको भएका छन् । सोही दिन कोरोनाबाट ४७७ जनाको मृत्यु भयो । यसअघि सबैभन्दा बढी १६ सेम्टेम्बर २०२० मा ९७ हजार ८६० जनाको संक्रमण भएको थियो । आइतबार सक्रिय संक्रमितको संख्या ५२ हजार ८४०ले बढेको छ ।

महाराष्ट्रमा एक दिनमा ५७ हजार बढी संक्रमण २२२ जनाको मृत्यु
भारतको पुरा देशभर कोरोना संक्रमण बढी रहेको छ । तर सबैभन्दा बढी प्रभावित महाराष्ट्र बनेको छ । पछिल्लो चौविस घण्टामा त्यहाँ ५७ हजार ५७ जनामा संक्रमण देखा परेको छ । सोही अवधीमा २२२ जनाको ज्यान गएको छ ।

दिल्लीमा एकै दिन चार हजार भन्दा बढी केश
उता देशको राजधानी दिल्लीमा एकै दिन ४ हजार बढी केश देखा परेको छ । दिल्लीमा आइतबार देखिएको केश गत ४ डिसेम्बर यताकै सबैभन्दा बढी हो । आइतबार त्यहाँ २१ जनाको मृत्यु भएको थियो ।

नयाँ संक्रमण एकैदिन बढी देखिने मामिलामा भारतले अमेरिका तथा ब्राजिललाई पछि पारेको छ । पछिल्ला दिनमा अमेरिकामा एक दिनमा ३७ हजार र ब्राजिलमा ३१ हजार केश भेटिएको थियो ।