इन्डोनेसियामा कोरोनाबिरुद्धको खोप लगाउन सुरू, पहिलो डोज राष्ट्रपतिलाई

  • कोरोना बिरुद्धको खोप सबै जनताले निशुल्क पाउने सरकारको घोषणा
  • - नेपाली हेल्थ

    जकार्ता । इन्डोनेसियामा बुधबारदेखि कोरोना विरुद्धको खोप लगाउन शुरु गरिएको छ । सबैभन्दा पहिलो खोप राष्ट्रपति जोको विडोडोले लगाएर देशका नागरिकलाई खोप लगाउने कार्यको शुरुआत गरिएको हो ।

    त्यहाँ चीनको सिनोभ्याक बायोटेकले बनाएको लगाउन शुरु गरिएको हो । डिसेम्बर महिनाको शुरुवातमै चीनबाट १२ लाख भाइल खोप जकार्ता पठाइएको थियो । तर त्यहाँको सरकारले खोप प्रयोगको अनुमति दिन ढिलाई गर्दा शुरुवात हुन केही समय लागेको सरकारी अधिकारीहरुले बताएका छन् ।उनीहरुले  जनवरीको सुरुवातमै १८ लाख भाइल खोप चीनबाट नै आउने जनाएका छन् ।

    बुधबार आफूले खोप लगाएपछि राष्ट्रपति विडोडोले खोपको आवश्यकता पर्ने आफ्नो देशका सबै नागरिकलाई निःशुल्क खोप उपलब्ध गराउने प्रतिबद्धता पनि व्यक्त गरेका छन् ।

    विश्वको चौथो धेरै जनसङ्ख्या भएको मुलुक इन्डोनेसियाको यस कदमलाई प्रशंसनीय मानिएको छ ।

    इन्डोनेसियामा कोरोनाका कारण अहिलेसम्म १९ हजारभन्दा बढीको मृत्यु भइसकेको छ भने छ लाख ३० हजारभन्दा बढी सङ्क्रमित भएका छन् ।

    खोप लगाएपछि सामाजिक सञ्जाल ट्वीटरमा राखेको भिडियोमा उनले भनेका छन्, “कोरोनाविरुद्धको खोप सबै नागरिकलाई निःशुल्क लगाइने छ ।”

    सरकारले शुरुमा स्वास्थ्यकर्मी र ज्येष्ठ नागरिकहरूलाई खोप लगाइने र त्यसपछि जोखिमको मात्राका आधारमा प्राथमिकता निर्धारण गरेर सबैलाई लगाइने जनाएको छ ।

    राष्ट्रपति विडोडोले आफूले खोप लगाउन पाएकोमा खुशी लागेको उल्लेख गरेका छन् । त्यही खुशी सबै नागरिकलाई प्राप्त हुने दाबी पनि उनले गरेका छन् ।

    “कुनै नागरिकले कोरोनाविरुद्धको खोप निःशुल्क लगाउन नपाउने कुनै कारण छैन, यसमा सबै ढुक्क हुनु होला, तपाईहरू सबैले निःशुल्क खोप लगाउन पाउनु हुनेछ,” राष्ट्रपति विडोडोले भने ।

    इन्डोनेसियाले विभिन्न विदेशी औषधि उत्पादक कम्पनीहरूसँग ३५ करोड खोप किन्नका लागि सम्झौता गरिसकेको पनि अधिकारीहरूले जनाएका छन् ।


    Facebook Comment


    थप समाचार