धरान, २१ कात्तिक । वीपी कोइराला स्वास्थ्य विज्ञान प्रतिष्ठानको कोभिड अस्थायी अस्पतालमा १४ बर्षीय बालक सहित दुई जनाको मृत्यु भएको छ । मृत्यु हुनेमा उदयपुर कटारीका एक जना १४ बर्षीय बालक र धरान १२ सुनसरीकी ७८ बर्षीया महिला छन् ।

उनीहरुको क्रमश शुक्रबार विहान ९ ५० बजे र विहीबार राती ११ बजे मृत्यु भएको हो ।

मृत्यु हुने बालकमा पहिले देखि क्षयरोगको समस्या थियो । महिलामा भने मानसिक स्वास्थ्य समस्या रहेको बताइएको छ । बालकको गत १२ कात्तिकमा कोभिड १९ पोजेटिभ भएको पत्ता लागेको थियो । उनलाई नोवेल अस्पतालले १६ कात्तिकमा धरान पठाएको थियो ।

यस्तै महिलाको भने २० कात्तिकमै कोभिड १९ पोजेटिभ भएको रिपोर्ट आएको, सोही दिन अस्पताल भर्ना भएको र सोही दिन नै ज्यान गएको अस्पतालका सहप्रवक्ता डा आशिष श्रेष्ठले बताए ।