इनरुवा, ६ पुस । सुनसरीको भोक्राहा नरसिंह गाउँपालिका–३ शिवगञ्ज टोलमा बीसीजी खोप लगाउँदा विहीबार एक महिने शिशुको मृत्यु भएको प्रहरीले जनाएको छ ।

शिशुको मृत्युपछि स्थानीयले नाराजुलुस गर्नुको साथै स्वास्थ्यकर्मीमाथि हातपातको समेत प्रयास गरेका छन् ।

खोपका कारण स्थानीय शिवु खत्वेको एक महीने छोरा शिवमको मृत्यु भएको जिल्ला प्रहरी कार्यालयका प्रहरी नायब उपरीक्षक ज्ञानेन्द्रप्रसाद फुँयालले जानकारी दिए ।

शिशुलाई दिउँसो १ बजेको समयमा स्वास्थ्यचौकी भोक्रहाबाट खटिएकी अनमी गोमा ढकालले बीसीजी खोप लगाएकी थिइन ।

खोप लगाएको केही समयपछि बेहोस भएका शिशुलाई जिल्ला अस्पताल लगिएकामा उनको उपचारकै क्रममा मृत्यु भएको प्रहरी नायव उपरिक्षक फुयालले जानकारी दिए ।

शिशुको मृत्यु भएपछि पीडित परिवारसहित आक्रोशित स्थानीयवासीको भीडले स्वास्थ्यचौकीमा नाराजुलुस गर्नाका साथै स्वास्थ्यकर्मीमाथि हातपातको प्रयास गरेका थिए ।

खोप लगाउने अनमी ढकाललाई प्रहरीले नियन्त्रणमा लिइ अनुसन्धान थालेको छ । रासस