काठमाडौँ, २१ मंसिर । महाराजगञ्ज मेडिकल कलेजका विद्यार्थीहरुले क्याम्पस प्रमुख प्राडा प्रतावनारायण प्रसादको कार्यकक्षमा तालाबन्दी गरेका छन् । विगत आफूहरुसंग गरिएका सम्झौँताको कार्यान्वनय नभएको भन्दै उनीहरुले क्याम्पस प्रमुखको कक्षमा तालबन्दी गरेका हुन् । 

महाराजगञ्ज मेडिकल क्याम्पसका स्वतन्त्र विद्यार्थी युनियन संगै सत्तारुड दल निकटका विद्यार्थी संगठनहरु तालाबन्दीमा सहभागी भएका थिए ।

‘कलेजको अनावश्यक शुल्क, छात्राबास, विडिएसको डेन्टल चियरको गुणस्तर लगायतका विषयहरु उठाएका छौँ । त्यसबाहेक पव्लीक हेल्थका विद्यार्थीहरुका अरु मागहरु छन् । यी मागहरु पुरा गर्नुपर्छ,’ स्ववियू सभापति डा मिलन गैरेले भने ।

दुई दिन अघि मात्रै महाराजगञ्ज क्याम्पसको प्राध्यापक संघको चुनाव शुरु भएर स्थगित भएको थियो । चुनाव गराउने अधिकारीहरुले नै राजिनामा बुझाएपछि उम्मेद्धारी दर्ता भइसकेको चुनाव स्थगित भएको थियो ।