ललितपुर, २८ कात्तिक । विश्व मधुमेह दिवसको अवसर पारी जावलाखेल स्थित काठमाडौँ डाइविटिज एण्ड थाइराइड सेन्टरले आज अस्पताल परिसरमा मधुमेह सम्वन्धी निःशुल्क स्वास्थ्य शिविर सञ्चालन गरेको छ ।

उक्त शिविरबाट २५० बढीले निशुल्क स्वास्थ्य परीक्षण गराएका थिए । परीक्षण गराउन आउनेहरुलाई आवश्यकताको आधारमा निशुल्क औषधि समेत उपलव्ध गराइएको थियो ।

शिविरमा विशेषगरी व्लड सुगर परीक्षण गरिएको मधुमेह,थाइराइड तथा हर्मोन रोग विशेषज्ञ डा. अंशुमाली जोशीले जानकारी दिए ।

त्यसअघि संस्थाले जाउलाखेल र भक्तपुरको दरबारस्क्वायर क्षेत्रमा मधुमेह सम्वन्धी जनचेतनामुलक प्रभातफेरी कार्यक्रम र निशुल्क स्वास्थ्य शिविर सञ्चालन गरेको थियो ।