काठमाडौँ, २६ माघ । स्तरबृद्धि भई पदस्थापनको माग राखि झण्डै डेढ महिना देखि स्वास्थ्य मन्त्रालय केन्द्रीत आन्दोलन गर्दै आएका सीअहेवहरुले बिहीबार (भोलि) पछि आन्दोलनको स्वरुप परिवर्तन गर्ने बताएका छन् । बिहीबार मन्त्रिपरिषद्को बैठक बस्ने भन्दै उनीहरुले आन्दोलनको स्वरुप पनि मन्त्रिपरिषद्को बैठकपछि आउने निर्णयका आधारमा तय गरिने जानकारी दिएका छन् ।

स्तरबृद्धि भएका तर पदस्थापन हुन नसकेका सीअहेवहरुले लामो समय देखि आन्दोलन गर्दै आएका छन् । उनीहरुको आन्दोलनमा स्वास्थ्यकर्मी युनियन नेपाल, मधेशी स्वास्थ्यकर्मी फोरम नेपाल, राष्ट्रिय स्वास्थ्यकर्मी संघ नेपाल, नेपाल स्वास्थ्यकर्मी युनियन, अलि नेपाल स्वास्थ्यकर्मी युनियन, नेपाल राष्ट्रिय स्वास्थ्यकर्मी संगठन र नेपाल स्वास्थ्यकर्मी संघले ऐकेवद्धता जनाएका छन् ।

पदस्थापनको विषयमा भएको आन्दोलन र भावि रणनीतिको बारेमा छलफल गर्न मंगलबार बसेको सात वटा संगठनको बैठकले विहीबारको मन्त्रिपरिषदको बैठकपछि नयाँ रणनीति अघि सार्ने घोषणा गरेका छन् ।

‘अव आन्दोलन यहि रुपमा रहँदैन,’ राष्ट्रिय स्वास्थ्यकर्मी संघ नेपालका अध्यक्ष भक्तिमान सुव्बाले भने, ‘कि त ब्याक हुन्छाँै कि त चर्काएर लान्छौँ ।’  उनले भोलीको मन्त्रिपरिषद बैठकमा आफूहरुको माग कार्यान्वनयका विषयमा सरकारले केही निर्णय गरे आन्दोलन रोकिने र नगरे थप चर्काउने योजना भएको बताए ।

त्यसो त पदस्थापन गर्नुपर्ने आन्दोलनको बिषयमा तत्काल सम्वोधन गर्नुपर्ने भन्दै स्वास्थ्यकर्मी युनियन नेपाल, मधेशी स्वास्थ्यकर्मी फोरम नेपाल, राष्ट्रिय स्वास्थ्यकर्मी संघ नेपाल, नेपाल स्वास्थ्यकर्मी युनियन, अलि नेपाल स्वास्थ्यकर्मी युनियन, नेपाल राष्ट्रिय स्वास्थ्यकर्मी संगठन र नेपाल स्वास्थ्यकर्मी संघले सयुक्त विज्ञप्ती समेत जारी गरेका छन् ।

उनीहरुले भोलीको मन्त्रिपरिषदको बैठकमा आफूहरुका विषयमा केही निर्णय नभए मन्त्रालय केन्द्रीत आन्दोलन थप चर्काउने र आकस्मिक सेवा बाहेक जिल्ला तथा राष्ट्रिय स्तरबाट हुने अभियानहरु तालिम तथा गोष्ठि तथा नियमित कार्यक्रमहरु समेत रोक्ने निर्णय गरेका छन् ।

पदस्थापना नहुँदा स्तरबृद्धि भई छैटौँ तहमा पुगेका सीअहेवले स्वास्थ्यचौकीमा पाँचौ तहको हेल्थ असिस्टेन्टको मातहतमा रहेर काम गर्न परेको भन्दै आन्दोलन गरेका हुन् । उता हेल्थ असिस्टेन्टहरुले भने नेतृत्व आफैले गर्नपाउने माग गर्दै आएका छन् ।